Ijtimoiy tarmoqlarda Toshkentning Chilonzor tumanidagi “Abu Saxiy” buyum bozoridagi ko‘p qavatli avtoturargohda avtomobil yongani haqidagi xabarlar tarqaldi. Tuman hokimligi holat yuzasidan ma’lumot berdi.
Chilonzor tumani IIOFMB va tuman FVB mutasaddilari bergan ma’lumotga ko‘ra, 27-oktabr kuni soat taxminan 06:52 larda “Toshkent savdo markazi” hududida joylashgan ko‘p qavatli avtoturargohning 5-qavatida B.A.ga tegishli Orlando dvigatel qismida texnik nosozlik sababli qisqa tutashuv bo‘lgan. Natijada mashina kapot ostidagi elektr simlarida yong‘in kelib chiqqan.
Mazkur holat “Toshkent savdo markazi” Yong‘in xavfsizligini ta’minlash xodimlari tomonidan soat 07:10 larda to‘liq bartaraf etilgan. Yong‘in oqibatida fuqarolarga, shuningdek, bino va atrofdagi boshqa mashinalarga zarar yetmagan.
Chilonzor tumani FVB mas’ullarining ma’lumotiga ko‘ra, yong‘in haqida Toshkent shahar FVBga xabar kelib tushmagan. Hozirda tuman FVB tomonidan avtoturargohda yong‘in sabablari va yong‘in xavfsizligi holatlari tekshirilmoqda.
Izoh (0)