Rossiya prezidenti matbuot kotibi Dmitriy Peskov Vladimir Putin Gvineya-Bisau prezidenti Umaru Sisoku Embalo orqali Ukraina prezidentiga sulh bo‘yicha muzokaralarga tayyorligini yetkazmaganini aytdi, deb yozadi “Kommersant”.
Peskovning so‘zlariga ko‘ra, davlat rahbari Umaru Sisoku Embaloga Ukraina hukumati bilan muzokaralar qanday borgani va Kiyev vakillari “radarlardan g‘oyib bo‘lgani” haqida gapirib bergan. Gvineya-Bisau prezidenti shunchaki bu pozitsiyani Vladimir Zelenskiyga yetkazmoqchi bo‘lgan, “alohida murojaat” bo‘lmagan, deya aniqlik kiritdi Peskov.
Matbuot kotibi ma’lum qilishicha, Rossiya Ukraina bilan muzokaralar bo‘yicha “o‘z pozitsiyasini hozir amalda o‘zgartirgani yo‘q”, biroq Kiyev buni “umuman istamasligi”ni ko‘rsatyapti.
Muzokaralardan bosh tortish, Dmitriy Peskovning so‘zlariga ko‘ra, “Vashington buyrug‘i bilan bo‘layotgani ko‘rinib turibdi”.
Avvalroq Gvineya-Bisau prezidenti Umaru Sisoku Embalo Ukraina yetakchisi Vladimir Zelenskiy bilan Kiyevda o‘tkazgan matbuot anjumanida Rossiya prezidenti Vladimir Putin Ukraina rahbariga xabar yetkazishni so‘ragan, buning videosi Zelenskiyning Telegram’dagi kanaliga joylangan edi.
30-sentabr kuni Kremlda Donetsk va Lugansk xalq respublikalari hamda Ukrainaning Xerson va Zaporojye viloyatlari bosib olingan qismlarining “Rossiya tarkibiga kirishi” haqida shartnomalar imzolandi. O‘sha kuniyoq Ukraina hukumati NATOga qo‘shilish uchun ariza berdi. Zelenskiy o‘shanda Rossiya bilan muloqotga tayyorligini aytgan, lekin “boshqa prezident bilan” degan edi.
4-oktabr kuni esa Ukraina rasman Putin bilan har qanday muzokaralardan bosh tortdi.
Izoh (0)