Xitoy Tayvandan voz kechishi va buning o‘rniga Rossiya sharqini egallab olishi mumkin — ekspert

Xitoy Tayvandan voz kechishi va buning o‘rniga, Kremlning zaiflashganidan foydalanib, Rossiya sharqini egallab olishi mumkin. AQSH milliy xavfsizligi bo‘yicha tahlilchi Kreyg Xuper shunday fikr bildirdi, deb yozadi Forbes.

Xitoy Kommunistik partiyasi qurultoyi yakuniga kelib, Si Szinpin har qachongidan ko‘ra kuchaydi, hatto ichki muxolifat qoldiqlarini zaldan namoyishkorona quvib chiqardi va o‘zini uchinchi marta besh yillik muddatga tayinladi. Endi G‘arb Sining Xitoy hududiy ambitsiyalari bo‘yicha shafqatsiz yondashuvi Tayvan tufayli harbiy ziddiyatga aylanib ketishidan xavfsiramoqda. Biroq Xuperning fikricha, ular ortiqcha xavotirlanyapti — Xitoy uchun haqiqiy hududiy imkoniyat shimolda, Rossiyaning Uzoq Sharqida yotibdi, u yerda Rossiya fuqarolari bo‘lgan yuz minglab etnik xitoyliklar yashaydi.

Ziddiyat uchun asoslar chuqur ildizga ega. Xitoy va Rossiya yuz yillar davomida o‘zlarining umumiy chegarasi ustida tortishgan va kurashgan, “rasmiy” bitim esa 2008-yildagina qabul qilingan. Ammo Xitoy Rossiyadan Vladivostokni hamda u 1860-yildan buyon egalik qilib kelayotgan qariyb 23 ming kvadrat mil maydonga ega sobiq Xitoy hududlarini qaytarib berishni talab qilib, joriy kelishuvlarni bekor qilish uchun osongina bahona topishi mumkin, dedi ekspert.

Agar Xitoy yaqin vaqtlar ichida Tayvan tomonga harakat qilsa, keng ko‘lamli ziddiyat muqarrar bo‘ladi. Lekin agar Xitoy shimoldagi hududni bosib olsa, yangi resurslarni qo‘lga kiritadi va hatto, rossiyalik diktatorni maydondan olib tashlashga yordam bergani uchun, xalqaro hurmatga sazovor bo‘ladi.

Xitoyning Rossiyaning Osiyo qismini qaytarib olishga intilishi mantiqli. Tayvan Xitoyga nizodan boshqa narsani olib kelmaydi, Rossiyani Osiyodan siqib chiqarishga urinish esa och va ekspansiyaga intilayotgan Xitoy davlati uchun manfaatliroq imkoniyatlarni ochib beradi, deya xulosa qiladi tahlilchi.