Isroil mamlakat xavfsizligi nuqtai nazaridan Ukrainaga havo hujumiga qarshi mudofaa tizimlarini yetkazib bera olmaydi. Bu haqda mamlakat prezidenti Itsxak Gersog aytib o‘tdi, deb yozadi CNN.
Isroil prezidenti ma’lum qilishicha, gap muayyan sirlar haqida bormoqda, ular dushmanlar qo‘liga tushmasligi kerak.
“Shunday qurol borki, bizda hatto uning eksport uchun versiyasi yo‘q. Shunday narsalar borki, ular dushmanlarimiz qo‘liga tushib qolishini xohlamaymiz. Lekin yordam berishimiz mumkin bo‘lgan hamma narsalarda ko‘mak ko‘rsatishga harakat qilyapmiz”, — dedi Gersog.
Uning bu bayonoti Ukraina mudofaa vaziri Aleksey Reznikovning Isroilga “Temir gumbaz” mudofaa tizimini so‘rab qilgan murojaatiga javoban yangragan.
Isroil prezidenti AQSHda prezident Jo Bayden bilan uchrashdi. Uchrashuv, asosan, Eron muammosiga, shu jumladan, Eronning Ukrainadagi urushga aralashuviga bag‘ishlandi.
Itsxak Gersog Eron Rossiyaga qurol yetkazib berayotgani, u esa Ukrainada tinch aholini o‘ldirishda qo‘llanilayotganini qoraladi. Bundan tashqari, prezidentlar Eron yadro dasturini va Eron hukumatining namoyishlarda o‘z fuqarolariga qarshi xatti-harakatlarini muhokama qildi.
Undan avval esa Gersog davlat kotibi Entoni Blinken bilan uchrashib, Isroil Eron Rossiyaga uchuvchisiz uchar qurilmalar yetkazib berayotgani haqida razvedka ma’lumotlarini taqdim etganini bildirdi.
Avvalroq Isroil prezidenti Itsxak Gersog AQSHga tashrifi chog‘ida Rossiya Ukraina hududida Eron dronlaridan foydalanganiga oid dalillarni e’lon qilishi haqida xabar berilgandi.
Isroil va Ukraina munosabatlari
13-oktabr kuni Kiyev viloyatida muhim infratuzilma obyektlari kamikadze dronlar zarbalariga uchragan edi. Shundan keyin Ukraina tashqi ishlar vaziri Dmitriy Kuleba Isroil hukumatiga rasmiy nota yuborib, Kiyevga havo hujumiga qarshi mudofaa tizimlarini yetkazishni so‘rashini ma’lum qilgandi.18-oktabr kuni Isroil va Ukraina mudofaa vazirlari Benni Gans va Aleksey Reznikov o‘rtasida telefon orqali muloqot o‘tkazilishi kerak edi, biroq Isroil tomoni so‘nggi lahzada qo‘ng‘iroqni rad etdi.
Muzokaralardan bosh tortilishini nashr Rossiya Xavfsizlik kengashi raisi o‘rinbosari Dmitriy Medvedevning bayonoti bilan bog‘lamoqda, u avvalroq “Isroil tomonidan Kiyevga qurol-yarog‘ berilishi mamlakatlarimiz o‘rtasidagi barcha davlatlararo munosabatlarni buzishi” haqida ogohlantirgandi. Ertasi kuni Gans Isroil Ukrainaga qurol taqdim etmasligini ma’lum qildi.
Keyinroq esa Isroil Ukraina harbiylariga Eron dronlariga qarshi kurashish uchun zarur bo‘lgan razvedka ma’lumotlarini taqdim etib kelgani ma’lum bo‘ldi.
“Temir gumbaz” raketaga qarshi mudofaa tizimini Ukrainaga o‘tkazish masalasi 2021-yil sentabrida ham ko‘tarilgan edi. O‘shanda Politico manbasiga tayanib, amerikalik kongressmenlarning ba’zilari Kiyevga ikkita shunday tizimni yetkazib berishni taklif qilganini yozgan. Nashr suhbatdoshiga ko‘ra, bu “Ukrainaning Rossiyadan bo‘layotgan tahdidni zararsizlantirishga” yordam berishi kerak edi.
Rossiyaning Ukrainadagi bosqini boshlanganidan beri Isroil mamlakatga gumanitar yordam, shuningdek, o‘q o‘tkazmaydigan jilet va dubulg‘a kabi jihozlar yetkazib berdi. Biroq Ukrainaning Isroildagi elchisi Yevgeniy Korniychuk bu ta’minotda muammolar borligini aytgan. Uning so‘zlariga ko‘ra, Isroil Ukraina so‘raganidan ancha kam jilet va dubulg‘a jo‘natgan, shuningdek, mahsulotlar beshinchi emas, uchinchi toifada bo‘lgani sababli samarasizroq bo‘lgan.
Eron dronlari
Rossiyaga kamikadze dronlarni Eron yetkazib berayotgani haqida AQSH va Yevropa mamlakatlari hukumatlari gapirgandi. Bu haqda Amerika OAVlari ham yozgandi. Xususan, The Washington Post manbalariga ko‘ra, Tehron Moskvaga “o‘nlab” Mohajer-6 va ko‘p sonli Shahed-136 uchuvchisiz uchar qurilmalarini taqdim etmoqchi bo‘lgan. 20-oktabr kuni Yevroittifoq Eronning dron ishlab chiqaruvchi Shahed kompaniyasiga qarshi sanksiyalar kiritdi.Rossiyaning BMTdagi missiyasi G‘arb mamlakatlari ma’lumotlarini dezinformatsiya kampaniyasi hamda Moskva va Tehronga bosim o‘tkazish uchun to‘qib chiqarilgan bahona deb atadi. Eronning BMTdagi doimiy vakili Amid Said Iravaniy ham dronlar yetkazib berilayotgani haqidagi ayblovlar asossiz ekanini aytgandi.
Izoh (0)