“Bu qish Yevropa uchun keyingi uchtasiga nisbatan ancha oson bo‘ladi” — Novatek rahbari

Novatek bosh direktori Leonid Mixelson Verona Yevrosiyo forumida keyingi qish Yevropa uchun ancha qiyin bo‘lishini ta’kidladi deb xabar qiladi “RBK”.

“Bu qish Yevropa uchun keyingi uchtasiga nisbatan eng osoni bo‘lishi mumkin, chunki ular joriy mavsumda omborlarni to‘ldirishga muvaffaq bo‘ldi, biroq 2023-yil “ancha qiyinroq kechadi”, —dedi Mixelson.

Mixelsonning so‘zlariga ko‘ra, Yevropada mavjud gaz tanqisligi va Xitoyda talabning tiklanishini inobatga olgan holda, kelgusi yildan boshlab suyultirilgan gaz (LNG) bozoriga qo‘shimcha yuk taxminan 60-70 million tonnani tashkil etadi.

“Garchi Yevropa Qatar bilan gaz yetkazib berish bo‘yicha muzokaralar olib borayotgan bo‘lsa-da, Qatar faqat 2025-2026 yillarda 33 million tonnalik loyihalarni joriy qilishni boshlaydi”, — dedi Novatek rahbari.

“Qatar energetika vaziri Al-Kaabi ochiqchasiga aytdi: agar Rossiya gazi bozorga qaytmasa, inqiroz 2025-yilgacha davom etadi. 2023-yil esa ancha qiyin bo‘ladi, chunki Yevropa zaxiralari tugaydi”, — deb qo‘shimcha qiladi u.

Bloomberg xabariga ko‘ra, Yevropa qishgacha gaz omborlarini deyarli to‘ldirdi. Yevropa gaz infratuzilmasi operatorlari assotsiatsiyasi ma’lumotlariga ko‘ra, Yevropadagi gaz omborlari 93,6%, shu jumladan, Germaniyadagilar 97,5% to‘lgan. Biroq, agar ob-havo odatdagidan sovuqroq bo‘lsa, Germaniyada bu miqdor atigi ikki oyga yetadi, shuning uchun Yevropa LNG sotib olishni davom ettirishi kerak, deb yozadi agentlik.