Tovlamachilikda gumon qilinishi fonida Rossiyani tark etgan jurnalist Kseniya Sobchak Litvaga Isroil pasporti bilan kirgan. Bu haqda Litva davlat xavfsizlik departamenti direktori Daryus Yaunishkisga tayanib, Meduza xabar berdi.
“U hozir Litvada. Isroil pasportiga ega fuqaro sifatida unga viza kerak emas va u, yanglishmasam, 90 kun davomida shu yerda qolishi mumkin. Ha, biz buni tasdiqlaymiz”, — dedi Yaunishkis Ziniu radijas radiostansiyasi efirida. Avvalroq jurnalist Litvaga Isroil pasporti bilan kelgani haqida chegara xizmatidagi Litva OAV manbalari norasmiy tarzda xabar bergan edi.
Yaunishkisning qayd etishicha, Litva razvedkasida Sobchakning mamlakatda ekani xavfsizlikka tahdid solishi mumkinligi haqida hech qanday dalil yo‘q.
Kseniya Sobchak 26-oktabr kuni Rossiyani tark etib, OAV xabarlariga ko‘ra, Belarus hududi orqali Litvaga ketgan. Shu kuni Moskva viloyatida Sobchakning uyi tintuv qilindi, ammo u uyda bo‘lmagan.
Kseniya Sobchak “Rostex” davlat korporatsiyasidan tovlamachilikda gumon qilinmoqda. Huquq-tartibot idoralarining ma’lum qilishicha, ish bo‘yicha Sobchakning tijoriy direktori Kirill Suxanov va Tatlerning sobiq bosh muharriri Arian Romanovskiy qo‘lga olingan.
Kseniya Sobchak Isroil fuqaroligini olgani haqida aprel oyida Isroilning Haaretz gazetasi xabar bergan edi. O‘shanda Sobchakning onasi, senator Lyudmila Narusova bu haqda hech narsa bilmasligini, qizi Isroilga “tibbiy ishlar bilan” ketganini aytgan.
Izoh (0)