“Yuventus” muxlislari Allegrining iste’fosini talab qilmoqda. Turinliklar 9 yil deganda ilk bor YCHL pley-off bosqichiga chiqa olmadi

“Yuventus” Chempionlar Ligasining 5-turida “Benfika”ga mag‘lub bo‘ldi (3:4) va pley-offga chiqish imkoniyatini yo‘qotdi.

“PSJ” va “Benfika” 11 ochkodan to‘plagan holda guruh bosqichi masalasini ijobiy hal qildi. “Yuventus” 3 ochko bilan uchinchi o‘rinni egallab turibdi, “Makkabi X”da ham 3 ochko bor.

Turinliklar klubi 2013/14-yilgi mavsumdan beri ilk bor Chempionlar Ligasi pley-offiga yo‘llanma ololmadi. O‘shanda Antonio Konte qo‘l ostidagi jamoa guruhda “Real”, “Galatasaroy” va “Kopengagen” bilan birga tushgan va uchinchi o‘rinni egallagandi.

O‘sha mavsum Yevropa Ligasida yarim finalga qadar yetib borib, “Benfika” to‘sig‘idan o‘ta olmagan (1:2, 0:0).

Ushbu mag‘lubiyatdan keyin “Yuventus” muxlislari ijtimoiy tarmoqlar orqali Massimiliano Allegrining iste’fosini talab qila boshladi. Twitter’da #AllegriOut heshtegi trendga chiqqan.

Mutaxassisning o‘zi Chempionlar Ligasidagi muvaffaqiyatsizlikni quyidagicha izohladi.

Buni katta muvaffaqiyatsizlik deb hisoblamayman. Futbolda mag‘lubiyatlar uchrab turadi. Afsusdamiz, jahlimiz chiqyapti. Jamoa o‘yin so‘ngida yaxshi o‘ynadi, shunday ekan gap jismoniy holatda emas. Shunchaki ishlashda davom etishimiz kerak, — deydi Allegri.