«Ювентус» мухлислари Аллегрининг истеъфосини талаб қилмоқда. Туринликлар 9 йил деганда илк бор ЕЧЛ плей-офф босқичига чиқа олмади

«Ювентус» Чемпионлар Лигасининг 5-турида «Бенфика»га мағлуб бўлди (3:4) ва плей-оффга чиқиш имкониятини йўқотди.

«ПСЖ» ва «Бенфика» 11 очкодан тўплаган ҳолда гуруҳ босқичи масаласини ижобий ҳал қилди. «Ювентус» 3 очко билан учинчи ўринни эгаллаб турибди, «Маккаби Х»да ҳам 3 очко бор.

Туринликлар клуби 2013/14 йилги мавсумдан бери илк бор Чемпионлар Лигаси плей-оффига йўлланма ололмади. Ўшанда Антонио Конте қўл остидаги жамоа гуруҳда «Реал», «Галатасарой» ва «Копенгаген» билан бирга тушган ва учинчи ўринни эгаллаганди.

Ўша мавсум Европа Лигасида ярим финалга қадар етиб бориб, «Бенфика» тўсиғидан ўта олмаган (1:2, 0:0).

Ушбу мағлубиятдан кейин «Ювентус» мухлислари ижтимоий тармоқлар орқали Массимилиано Аллегрининг истеъфосини талаб қила бошлади. Twitter’да #AllegriOut ҳештеги трендга чиққан.

Мутахассиснинг ўзи Чемпионлар Лигасидаги муваффақиятсизликни қуйидагича изоҳлади.

Буни катта муваффақиятсизлик деб ҳисобламайман. Футболда мағлубиятлар учраб туради. Афсусдамиз, жаҳлимиз чиқяпти. Жамоа ўйин сўнгида яхши ўйнади, шундай экан гап жисмоний ҳолатда эмас. Шунчаки ишлашда давом этишимиз керак, — дейди Аллегри.