“Ukrainani qayta tiklash uchun Kiyev hali bir sent ham olmadi” — Zelenskiy

Ukraina 17 milliard dollarlik tezkor tiklanish rejasini amalga oshirish uchun hali “bir sent ham” olgani yo‘q, dedi mamlakat prezident Vladimir Zelenskiy. Bu haqda u Berlinda o‘tkazilgan Ukrainani qayta tiklash bo‘yicha xalqaro konferensiyadagi onlayn nutqi chog‘ida gapirdi.

Shuningdek, u raketa hujumlari oqibatida mamlakat energetika sektorining uchdan bir qismidan ko‘prog‘i vayron bo‘lganini aytdi.

“Rossiya qishdan omon chiqishimizni qiyinlashtirish uchun hamma narsani yo‘q qilmoqda”, —dedi Zelenskiy.

Germaniya kansleri Olaf Shols Berlindagi konferensiyaning ochilishi oldidan u “XXI asr Marshal rejasi”ni yaratishga bag‘ishlanishini aytgan.

Shols Yevropa Ittifoqi rahbari Ursula fon der Lyayen bilan birgalikda Frankfurter Allgemeine Zeitung uchun maqolasida Ukrainani qayta tiklash rejasini taklif qilgan va uni “XXI asrning yangi Marshall rejasi” deb atagan edi.

Shols va fon der Lyayen maqolasida Ukraina Yevroittifoqqa a’zo bo‘lish uchun nomzod ekanini eslatdi. “Shuning uchun qayta tiklanish sari yo‘l — Ukrainaning Yevroittifoqqa tomon yo‘li hamdir”, — deyiladi maqolada. Ularning fikricha, “tinchlikka hali ancha bor bo‘lsa-da” mamlakatni tiklash haqida tezroq o‘ylash kerak. Ukraina “tezda oyoqqa turishi” uchun vayron bo‘lgan turar joy binolari, maktablar, yo‘llar, ko‘priklar, energetika infratuzilmasini tiklash masalasi hozirdan hal qilinishi zarur.

“Jahon banki ma’lumotlariga ko‘ra, harbiy amaliyotlar oqibatida Ukrainaga yetkazilgan zarar 350 milliard yevroni tashkil etadi”,  — deyiladi maqolada.