Toshkent viloyati Oqqo‘rg‘on tumanida joylashgan Qanqa yodgorligida olib borilgan izlanishlar natijasida XI—XII va VII—VIII asrlarga oid mahobatli inshoot qoldiqlari topildi. Bu haqda “Dunyo” axborot agentligi xabar qildi.
Qayd etilishicha, Fanlar akademiyasi Milliy arxeologiya markazi Qanqa majmuasi ekspeditsiyasining 2022-yili Toshkent vohasining eng yirik shaharlaridan bo‘lgan tarixiy Qanqa yodgorligida olib borgan arxeologik izlanishlari davomida vohaning o‘rta asrlar tarixiga oid yangi ma’lumotlar kashf etilgan.
Jumladan, XI—XII asrlar bilan davrlashtirilgan uzunligi 12 metr, kengligi 6,30 metr bo‘lgan katta zal topilgan. Uning kirish qismidagi poli pishiq g‘ishtlar bilan terilgan. Zalning yon devorlari qalinligi 1,30 metr kenglikda ekani uning mahobatli inshootligidan dalolat beradi.
Zalning janubiy-g‘arbiy burchagida yon devorlari ham pishiq g‘isht bilan qoplangan bo‘lib, kuchli olov natijasida kuygani bu yerda yog‘ochdan ishlangan peshtoq ham mavjud bo‘lganini ko‘rsatadi. Yong‘in oqibatida peshtoqdan qulab tushgan yirik yog‘och qoldiqlari ham aniqlanib, ularning saqlanib qolganlari sinchiklab o‘rganilganda yuza qismlari o‘yma naqshlar bilan bezalgani ma’lum bo‘lgan.
Qazish ishlari davomida, shuningdek, o‘rta asr qatlamlari ostida ilk o‘rta asrlarga oid bo‘lgan yana bir yirik inshoot qoldiqlari topilgan. Inshoot Qanqa yodgorligining ilk o‘rta asrlarga tegishli ibodatxonaning sharqiy tarafida joylashgani ushbu yirik qurilish qoldiqlari ibodatxona bilan bevosita bog‘liq bo‘lishi mumkinligi haqida xulosalar chiqarishga imkon beradi.
2022-yilga mo‘ljallangan dala-qazish tadqiqotlari yakunlangan.
“Yuqoridagi fikrlar dastlabki tadqiqot natijalari xulosalari bo‘lib, taqdim etilgan ma’lumotlar qayta ishlangach, to‘liq yakuniy xulosalar beriladi”, — deyiladi xabarda.
Izoh (0)