Тошкент вилояти Оққўрғон туманида жойлашган Қанқа ёдгорлигида олиб борилган изланишлар натижасида XI—XII ва VII—VIII асрларга оид маҳобатли иншоот қолдиқлари топилди. Бу ҳақда «Дунё» ахборот агентлиги хабар қилди.
Қайд этилишича, Фанлар академияси Миллий археология маркази Қанқа мажмуаси экспедициясининг 2022 йили Тошкент воҳасининг энг йирик шаҳарларидан бўлган тарихий Қанқа ёдгорлигида олиб борган археологик изланишлари давомида воҳанинг ўрта асрлар тарихига оид янги маълумотлар кашф этилган.
Жумладан, XI—XII асрлар билан даврлаштирилган узунлиги 12 метр, кенглиги 6,30 метр бўлган катта зал топилган. Унинг кириш қисмидаги поли пишиқ ғиштлар билан терилган. Залнинг ён деворлари қалинлиги 1,30 метр кенгликда экани унинг маҳобатли иншоотлигидан далолат беради.
Залнинг жанубий-ғарбий бурчагида ён деворлари ҳам пишиқ ғишт билан қопланган бўлиб, кучли олов натижасида куйгани бу ерда ёғочдан ишланган пештоқ ҳам мавжуд бўлганини кўрсатади. Ёнғин оқибатида пештоқдан қулаб тушган йирик ёғоч қолдиқлари ҳам аниқланиб, уларнинг сақланиб қолганлари синчиклаб ўрганилганда юза қисмлари ўйма нақшлар билан безалгани маълум бўлган.
Қазиш ишлари давомида, шунингдек, ўрта аср қатламлари остида илк ўрта асрларга оид бўлган яна бир йирик иншоот қолдиқлари топилган. Иншоот Қанқа ёдгорлигининг илк ўрта асрларга тегишли ибодатхонанинг шарқий тарафида жойлашгани ушбу йирик қурилиш қолдиқлари ибодатхона билан бевосита боғлиқ бўлиши мумкинлиги ҳақида хулосалар чиқаришга имкон беради.
2022 йилга мўлжалланган дала-қазиш тадқиқотлари якунланган.
«Юқоридаги фикрлар дастлабки тадқиқот натижалари хулосалари бўлиб, тақдим этилган маълумотлар қайта ишлангач, тўлиқ якуний хулосалар берилади», — дейилади хабарда.
Изоҳ (0)