“Daryo” nashri 25-oktabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Rossiya Ukrainaga Belarus hududidan kamikadze dronlar bilan zarba berdi
25-oktabr kuni ertalab Kiyev shahri va viloyatida havo trevogasi e’lon qilindi. Ukraina Havo kuchlari xabar berishicha, Rossiya Belarus hududidan Shahed kamikadze dronlarini uchirgan.
Havo kuchlari matbuot kotibi Yuriy Ignat so‘zlariga ko‘ra, Rossiya Eronda ishlab chiqarilgan o‘nta uchuvchisiz uchar qurilmalarni uchirgan. “Ular Kiyevga aynan Belarus yo‘nalishida birinchi marta hujum qilayotgani yo‘q, — dedi u. — Ular Dnepr o‘zani bo‘ylab uchib kelmoqda”.Ignatning qo‘shimcha qilishicha, kunduz kuni dronlarni urib tushirish osonroq, chunki nishonlar aniqroq ko‘rinadi.
Avvalroq Britaniya Mudofaa vazirligi Ukraina Rossiya tomonidan uchirilayotgan Eron dronlarini urib tushirishda tobora ko‘proq muvaffaqiyat qozonayotganini ma’lum qilgandi.
AQSHda bir guruh kongressmenlar Baydenni Rossiya bilan bevosita muzokaralar boshlashga chaqirdi. Oq uy bu tashabbusni qo‘llab-quvvatlamadi
AQSH Demokratik partiyasidan 30 nafar Kongress a’zosi prezident Jo Baydenga maktub yo‘llab, uni Rossiya bilan to‘g‘ridan to‘g‘ri muzokaralar boshlashga chaqirdi. Ularning ta’kidlashicha, bu urushning tugashiga olib kelishi mumkin, deb yozmoqda The Washington Post.
Murojaat mualliflarining fikricha, Ukrainaga misli ko‘rilmagan harbiy va moliyaviy yordam ko‘rsatayotgan Bayden “o‘t ochishni to‘xtatishga real asos” topish uchun Rossiya bilan bevosita muzokaralarni ham boshlashi kerak. Ularning ta’kidlashicha, diplomatik yechimdan boshqasi “halokatli va aqlbovar qilmaydigan xavflar” bilan “uzoqqa cho‘zilgan urush”ni anglatadi.
The Washington Post ta’kidlaganidek, Demokratik partiyadagi bir guruh safdoshlari birinchi marta Baydenni Ukrainadagi urushga oid siyosatni keskin o‘zgartirishga chaqirmoqda. Oq uy AQSH Davlat departamenti kongressmenlarning murojaatiga izoh berar ekan, Jo Bayden hali Rossiya bilan to‘g‘ridan to‘g‘ri muzokaralar o‘tkazish g‘oyasini qo‘llab-quvvatlamayotganini ma’lum qildi.
AQSH prezidenti ma’muriyati Milliy xavfsizlik kengashining strategik aloqalar bo‘yicha koordinatori Jon Kirbi Ukrainaning ishtirokisiz Rossiya bilan muzokaralar olib borish hamon imkonsiz ekanini aytdi. Davlat departamenti matbuot kotibi Ned Praysning ta’kidlashicha AQSH Rossiyaning muloqot va diplomatik sa’y-harakatlarga tayyorligiga belgi ko‘rmayapti.
Turkmanistonda yuzlab mahbuslar Ukrainadagi urushga yuborilgani ma’lum qilindi
Turkmanistonda kamida 500 nafar rus tilida so‘zlashuvchi mahbuslarni yig‘ib, Moskvaga yuborishgan, so‘ng ular Vagner guruhi tarkibida Ukrainadagi urushga jo‘natilgan. Bu haqda turkmanistonlik muxolifatchi siyosatchi Murod Qurbonov mahalliy faollarga tayanib ma’lum qildi.
Mahbuslarga go‘yoki Rossiya pasportlari berilgan, ular o‘n kun davomida harbiy tayyorgarlikdan o‘tkazilgan, shundan keyin ularning hammasi frontga jo‘natilgan. Shartnoma bo‘yicha jang qilish evaziga sudlanganlikni olib tashlashni va 1000 dollar to‘lashni va’da qilishmoqda. Turkmaniston fuqarolarining o‘limini esa mahalliy maxsus xizmatlar koronavirusga yo‘ymoqda, ularning jasadlari qarindoshlariga berilmasligini shu bilan izohlamoqda.
Avvalroq “Vagner” xususiy harbiy kompaniyasi va Rossiya Mudofaa vazirligi “yollovchilari” butun mamlakat bo‘ylab 15 130 nafar mahbusni urushga olib ketgani ma’lum qilingan edi.
Ramzan Qodirov Ukrainaga faol zarba berishga chaqirdi
Checheniston rahbari Ramzan Qodirov yana Ukrainadagi “maxsus harbiy operatsiya”ning borishini tanqid qildi va Ukraina shaharlariga kuchliroq zarba berishga chaqirdi. Bu haqda 24-oktabr, dushanba kuni u o‘zining Telegram kanalida audio qoldirdi.
“Rossiya Ukraina tomonidan Rossiyaning yangi hududlari o‘qqa tutilishiga kuchsiz javob qaytarmoqda”, — dedi u. Qodirovning fikricha ukrainaliklar “Rossiya yo‘nalishida” o‘q uzishni xayoliga ham keltirmasligini tushunishi uchun qattiqroq choralar ko‘rish zarur. Uning so‘zlariga ko‘ra, jangovar harakatlar allaqachon “Rossiya hududida” olib borilmoqda. Qodirov hozirgi vaziyatdan juda norozi ekanini, biroq uning fikricha, “bundan yomonrog‘i” bo‘lmasligini ta’kidladi.
Jahon banki Buyuk Britaniya kafolati ostida Ukrainaga 500 mln dollar ajratdi,ammo Bayden ma'muriyati Ukrainaga qo‘shin yuboradimi?
Jahon banki favqulodda ehtiyojlarni qondirish uchun Ukrainaga qo‘shimcha 500 mln dollar yordam ajratilishini e’lon qildi. Bu haqda Reuters xabar bermoqda.
500 mln dollarlik mablag‘ Buyuk Britaniya kafolati ostida o‘tkazildi. Qo‘shimcha 30 mln dollarga esa Daniya kafil bo‘ladi. Jahon banki prezidenti Devid Malpassning aytishicha, mablag‘ asosiy davlat xizmatlarini qo‘llab-quvvatlashga yo‘naltiriladi.
U Ukrainada harbiy harakatlar natijasida infratuzilma bilan bog‘liq muammolar mavjudligini, bu esa qish arafasida “Ukraina xalqiga xavf tug‘dirayotganini” ta’kidladi. Shu davrga qadar Jahon banki Ukrainaga favqulodda moliyalashtirish uchun 13 milliard dollar ajratdi.
Bank Ukrainaning tiklanishini 350 milliard dollar deb baholamoqda. Ukraina o‘ziga kerak bo‘ladigan budjet yordamini oyiga 4-5 milliard dollar deb baholagan. Kiyev Yevropa Ittifoqi 2 milliard dollar ajratishini kutmoqda, shundan 500 million dollar Germaniyadan keladi. Germaniya prezidenti Frank-Valter Shtaynmayer bugun, 25-oktabr kuni ertalab e’lon qilinmagan tashrif bilan Kiyevga keldi
Focus jurnalining qayd etishicha, Germaniya prezidenti Ukrainaga urush boshlanganidan beri uchinchi urinishda kelgan. Jahondagi hozirgi vaziyatdan kelib chiqib Jo Bayden ma’muriyati Ukrainaga qo‘shinlar yubormaslikka va’da bermoqda.
Izoh (0)