O‘zbekistondagi maktablarda quyosh panellari o‘rnatilmoqda

Xalq ta’limi vazirligi O‘zbekistondagi umumta’lim maktablariga quyosh elektr panellarini o‘rnatish ishlari amalga oshirilayotganini ma’lum qildi.

Qayd etilishicha, XTV tomonidan 390 ta umumta’lim maktabiga quyosh elektr panellarini o‘rnatish ishlari amalga oshiriladi. Mahalliy hokimliklar tomonidan 610 ta maktab binosiga quyosh elektr panellari o‘rnatiladi.

2022-yil 10-iyun kuni prezident rahbarligida qayta tiklanuvchi energiyadan foydalanishni kengaytirish masalalari bo‘yicha o‘tkazilgan videoselektor yig‘ilishida joriy yil yakuniga qadar Xalq ta’limi vazirligi, tegishli tashkilotlar hamda mahalliy hokimliklar oldiga O‘zbekistondagi 1000 ta umumta’lim maktabi binolarida quyosh elektr panellari va quyosh suv isitish qurilmalarini o‘rnatish vazifasi qo‘yilgandi.

Shunga ko‘ra, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari oldiga 2022-yil yakuniga qadar joylardagi 610 ta umumta’lim maktabiga kamida 5-10 kVt quvvatga ega quyosh elektr panellarini o‘rnatish topshirig‘i berilgan.

Bugungi kunga qadar mahalliy hokimliklar hamda homiylar tomonidan Andijon, Navoiy, Sirdaryo, Farg‘ona hamda Toshkent viloyatlaridagi maktablarda mazkur turdagi quyosh elektr panellarini o‘rnatish ishlari amalga oshirilmoqda.

Maktab binolarini quyosh elektr panellari bilan ta’minlashda homiylik yordamlaridan ham keng foydalanilmoqda. Xususan, Falcon Hunting Solutions MCHJ homiyligida Toshkent viloyatida 21 ta umumta’lim maktablariga quyosh elektr panellarini o‘rnatish ishlari amalga oshirilmoqda.

Mavzuga doir:

• Shavkat Mirziyoyev 2022-yilda barcha OTMlarda quyosh panellarini o‘rnatishni topshirdi
• O‘zbekistonda quyosh panellarini ishlab chiqarish bo‘yicha investitsiya loyihalari tasdiqlandi