Bugun, 25-oktabr kuni Qozog‘istonda 13 yildan buyon birinchi marta Respublika kuni nishonlanmoqda. Bayram 2009-yilda bekor qilingandi, biroq bu yil prezident Qosim-Jo‘mart To‘qayev tashabbusi bilan unga milliy bayram maqomi qaytarib berildi. Bu haqda Asia Plus xabar bermoqda.
Ostonada va boshqa yirik shaharlarda tantanali va ko‘ngilochar tadbirlar o‘tkazilmoqda, kechqurun esa poytaxtda bayram mushakbozligi bo‘lib o‘tadi. Ertalab davlat rahbari qarorgohi yonida davlat bayrog‘ini ko‘tarish marosimi o‘tkazildi.
2022-yil iyulida Milliy qurultoy majlisida To‘qayev milliy bayramlar ro‘yxatiga bir qator o‘zgartirishlar kiritish vaqti kelganini aytgandi.
“Respublika kuniga milliy bayram maqomini qaytarib berishni taklif qilaman. Shuni eslatmoqchimanki, 1990-yil 25-oktabrda Qozog‘iston davlat suvereniteti haqidagi deklaratsiya qabul qilingan. Bu mamlakatimizning mustaqillik yo‘lidagi birinchi qadami bo‘lgan. Ushbu hujjatni qabul qilishda birinchi prezident Nursultan Nazarboyev juda muhim rolni o‘ynagan”, — degandi Qozog‘iston rahbari o‘shanda.
Uning fikricha, Respublika kuni mamlakatning davlatchilik sari tashlagan tarixiy qadami ramziga aylanishi kerak.
Qozog‘iston SSR suvereniteti haqidagi deklaratsiyada respublika hududining yaxlitligi, bo‘linmasligi va daxlsizligi, xalqlar madaniyatlari va tillarining rivojlanishi, milliy o‘ziga xoslikning mustahkamlanishi belgilab qo‘yilgandi. 2009-yilgacha ushbu hujjat imzolangan kun davlat bayrami bo‘lib kelgan.
Eslatib o‘tamiz, Qozog‘istonda Birinchi prezident kuni davlat bayramlari toifasidan chiqarib tashlandi. Qozog‘istonda Birinchi prezident kuni 1-dekabrda nishonlangan va u dam olish kuni hisoblanardi. Bayram davlatning birinchi rahbari Nursulton Nazarboyev sharafiga tashkil etilgan: 1991-yil 1-dekabrda u respublika prezidenti etib saylangan. Ushbu bayramga davlat bayrami maqomi berish to‘g‘risidagi qonun 2011-yil 14-dekabrda imzolangan edi.
Avvalroq To‘qayev Qozog‘iston “tasodifan mustaqillikka erishgani” haqidagi gaplarga javob qaytargandi. U mamlakat “tasodifan erkinlikka erishgan” deb o‘ylamaydi, qozoq xalqi “suverenitetga olib boruvchi muqaddas yo‘ldan uzoq yillar yurib o‘tgan”.
Izoh (0)