AQSH Demokratik partiyasidan 30 nafar Kongress a’zosi prezident Jo Baydenga maktub yo‘llab, uni Rossiya bilan to‘g‘ridan to‘g‘ri muzokaralar boshlashga chaqirdi. Ularning ta’kidlashicha, bu urushning tugashiga olib kelishi mumkin, deb yozmoqda The Washington Post.
Murojaat bir guruh liberal kongressmen-demokratlar tomonidan tayyorlangan, unga parlament quyi palatasiga Vashingtondan vakillik qiluvchi Pramila Jayapala boshchilik qilgan.
Murojaat mualliflarining fikricha, Ukrainaga misli ko‘rilmagan harbiy va moliyaviy yordam ko‘rsatayotgan Bayden “o‘t ochishni to‘xtatishga real asos” topish uchun Rossiya bilan bevosita muzokaralarni ham boshlashi kerak. Ularning ta’kidlashicha, diplomatik yechimdan boshqasi “halokatli va aqlbovar qilmaydigan xavflar” bilan “uzoqqa cho‘zilgan urush”ni anglatadi.
The Washington Post ta’kidlaganidek, Demokratik partiyadagi bir guruh safdoshlari birinchi marta Baydenni Ukrainadagi urushga oid siyosatni keskin o‘zgartirishga chaqirmoqda.
Oq uy AQSH Davlat departamenti kongressmenlarning murojaatiga izoh berar ekan, Jo Bayden hali Rossiya bilan to‘g‘ridan to‘g‘ri muzokaralar o‘tkazish g‘oyasini qo‘llab-quvvatlamayotganini ma’lum qildi.
AQSH prezidenti ma’muriyati Milliy xavfsizlik kengashining strategik aloqalar bo‘yicha koordinatori Jon Kirbi Ukrainaning ishtirokisiz Rossiya bilan muzokaralar olib borish hamon imkonsiz ekanini aytdi. Davlat departamenti matbuot kotibi Ned Praysning ta’kidlashicha AQSH Rossiyaning muloqot va diplomatik sa’y-harakatlarga tayyorligiga belgi ko‘rmayapti.
AQSH — Ukrainaning asosiy ittifoqchilaridan biri bo‘lib, unga ko‘p milliard dollarlik yordam, jumladan, qurol-yarog‘ yetkazib bermoqda. Qo‘shma Shtatlar Rossiyaning Ukrainaga bosqini boshlanganidan so‘ng, Rossiyaga qarshi bir nechta sanksiyalar paketini ham joriy qildi.
Izoh (0)