Риши Сунак расман Британиянинг янги, 57-бош вазири этиб тайинланди, деб хабар бермоқда BBC News.
25 октябрь куни тушдан кейин Сунак қирол Чарльз III билан учрашди. Қирол ундан янги ҳукумат тузишни сўради.
Ундан олдин Чарльз III Букингем саройида собиқ бош вазир Лиз Трасснинг истеъфосини қабул қилган.
Собиқ молия вазири, 42 ёшли Риши Сунак Буюк Британиянинг сўнгги икки асрдаги энг ёш бош вазири бўлди.
Уч йил давомида Британия бош вазири лавозимини эгаллаб келган Борис Жонсон 2022 йил июль ойида, қатор жанжаллардан сўнг истеъфога чиққан эди. Сентябрь бошида Консерваторлар партияси янги сайловлар ўтказди, унда ўша пайтда Британия Ташқи ишлар вазирлигини бошқарган Лиз Трасс ғалаба қозонди. Бош вазир сифатида Трасс номақбул иқтисодий ислоҳотларни таклиф қилди ва 45 кундан кейин истеъфога чиқишга мажбур бўлди.
Консерваторлар партияси раҳбари учун навбатдаги сайлов 24 октябрга белгиланган эди, аммо у ўтказилмади, чунки Риши Сунак бош вазирликка ягона номзод бўлиб қолди. Овоз беришдан бироз олдин, асосий рақиб, Жамоатлар палатаси раҳбари Пенни Мордонт Сунакни қўллаб-қувватлаб, ўз номзодини қайтариб олди.
Риши Сунак илк бор 2015 йилда Буюк Британиянинг Жамоатлар палатасига сайланган. Уч йилдан сўнг у Тереза Мей ҳукуматида вазир ёрдамчиси лавозимини эгаллаган. 2019 йил июль ойида у Борис Жонсон ҳукуматида Британия Ғазначилигининг бош котиби этиб тайинланди. 2020 йил февраль ойида эса Сунак Британия молия вазири бўлди.
Изоҳ (0)