Марғилон шаҳрида «Атлас байрами» V халқаро анъанавий тўқимачилик фестивали бўлиб ўтди. Бу ҳақда «Дарё» мухбири Азизжон Эрматов хабар бермоқда.
Фестиваль Туризм ва маданий мерос вазирлиги, Фарғона вилояти ҳокимлиги, ЮНЕСКОнинг Ўзбекистондаги ваколатхонаси ва «Ҳунарманд» уюшмаси ташаббуси билан ўтказилди.
Халқаро миқёсда ўтказилган фестивалда Қозоғистон, Қирғизистон, Тожикистон, Малайзия, Ҳиндистон, Туркия, Таиланд, Бангладеш, Индонезия, АҚШ, Мўғулистон, Италия каби 20 дан зиёд мамлакатдан келган ҳунармандлар, маданият арбоблари, санъатшунос олимлар, дизайнерлар, рассомлар, соҳа мутахассислари иштирок этди.
Мазкур фестивалдан олдин Ўзбекистон ва Қирғизистон ҳунармандлари ҳамда дизайнерлари учун таниқли усталар иштирокида анъанавий ҳунармандчилик, либослар дизайни бўйича маҳорат дарслари ташкилланди.
Фестивальнинг тантанали очилиш маросимида Фарғона вилояти ҳокими Хайрулло Бозоров, Бутунжаҳон ҳунармандлар кенгаши президенти Саад ал-Каддумий иштирок этди.
Бутунжаҳон ҳунармандлар кенгаши томонидан Марғилон шаҳрига «Жаҳон ипак ва икат ҳунармандлари шаҳри» мақоми берилди. Бугунги кунда дунёнинг 4 та қитъасидан 57 та шаҳар бундай эътирофга сазовор бўлган. Вилоятда Қўқон шаҳридан сўнг Марғилон ҳам ушбу рўйхатга киритилди.
Ўзбек миллий ҳунармандчилигининг маркази бўлган Фарғона вилояти Марғилоннинг атлас ва адраслари, Риштоннинг кулолчилик санъати, Қўқоннинг ёғоч ўймакорлиги ва наққошлик мактаблари билан дунёга машҳур.
Марғилон азалдан атлас ва адрас тайёрлаш маркази бўлиб келган. Йўқолиб бораётган анъаналарни тиклаш ва асраб-авайлаш мақсадида 2007 йилда Марғилонда ҳунармандчиликни ривожлантириш маркази очилиб, ҳозирга қадар атлас ва адрас матоларини тайёрлаш технологиясини сақлаш, ривожлантириш ва оммавийлаштириш билан шуғулланиб келмоқда.
Марғилон ва унга туташ туманларда мато ва гилам тўқимачилиги, миллий либос ва миллий пойабзал тайёрлаш билан 3 мингга яқин, Риштон туманида анъанавий кулолчилик билан 5 мингдан ортиқ, Қўқон шаҳри ва унга туташ ҳудудларда ёғоч ўймакорлиги, заргарлик каби ҳунармандчилик турлари билан 10 мингга яқин оилалар шуғулланади.
Бугунги кунда шаҳарда атлас, адрас, беқасам ва шойи тўқиш билан 600 дан ортиқ уста шуғулланади. Ҳунармандлар томонидан қадимий намуналар асосида ишлаб чиқарилаётган «Марғилон», «Наврўз», «Расадхона», «Бибихоним», «Барги карам», «Чақирим», «Намозшомгул», «Қора кўзим», «Бегойим», «Ўзбекистон гўзали», «Қўчқоршох», «Гулдаста», «Келинчак атлас» деб номланган ипак матоларга бугун дунё миқёсида қизиқиш юқори.
Марғилон ҳунармандлари яратган гиламлар, ипак матолар, заргарлик ва зардўзлик буюмлари дунёнинг турли мамлакатларидан келган сайёҳларни ҳайратга солмоқда.
Фестиваль доирасида «Замонавий дунёда анъанавий тўқимачиликнинг ўрни» халқаро конференцияси, «Буюк ипак йўли ворислари» анъанавий тўқимачилик маҳсулотлари кўргазмаси, «Ikat маҳсулотларининг ишлаб чиқилиши ва экспорти соҳасидаги муваффақиятлар ва тўсиқлар» мавзусида давра суҳбати ўтказилди.
Халқ сайиллари спортчи ёшларнинг кўргазмали чиқишлари, дорбозлар ва миллий ўйинлар мусобақалари билан бошланди. Кураш, арқон тортиш, халқ амалий санъати — фольклор намуналари, бир-биридан мазали миллий таомлар танловлари ўтказилди.
Тўқимачилик ва амалий санъат буюмлари ярмаркаси, аския ва катта ашула ижрочилиги, фольклор ансамбллари, халқ ижрочиларининг дастурлари, концертлар ва қўғирчоқ театрлари томошалари намойиш қилинди.
Фольклор гуруҳлари, халқ ансамбллари, бадиий ҳаваскорлик жамоалари томонидан халқона куй-қўшиқлар, ўлан-лапарлар ижро этилди. Боғ бўйлаб ўрнатилган дошқозонларда ош дамланиб, байрам иштирокчиларига тарқатилди.
Ўзбекистоннинг турли вилоятлари вакиллари томонидан махсус павильонлар ташкил этилиб, ўша ҳудудга хос урф-одатлар кўрсатиб берилди, халқ амалий санъати ва ҳунармандчилик маҳсулотлари кўргазмалари ўтказилди.
Ижодкорлар боғида «Атлас байрами» бешинчи халқаро анъанавий тўқимачилик фестивалининг ёпилиш маросими бўлиб ўтди. Унда турли номинация бўйича ғолиблар эълон қилиниб, тақдирланди.
Муножот Йўлчиева, Илҳом Иброҳимов, Гулсанам Мамазоитова каби таниқли санъаткорлар иштирокидаги концерт дастури фестиваль иштирокчиларига байрамона кайфият улашди.
Изоҳ (0)