O‘zbekistondagi My Freighter yuk tashuvchi aviakompaniya o‘zining ilk samolyoti — Boeing-747 ga ega bo‘ldi.
Uzbekistan Airports’ning xabar qilishicha, 23-oktabr kuni mahalliy vaqt bilan soat 17:03 da aviakompaniyaning ushbu samolyoti Toshkent xalqaro aeroportiga kelib qo‘ndi. Samolyot an’anaviy ravishda suv arkasi bilan kutib olindi.
Jumbo Jet nomi bilan tanilgan va 105 tonna sig‘imga ega Boeing-747 My Freighter kompaniyasining birinchi shaxsiy yuk samolyoti bo‘ldi. 2019-yilda tashkil etilgan kompaniya shu paytgacha Uzbekistan Airways’dan ijaraga olingan samolyotlarda yuk reyslarini amalga oshirib kelgan.
Yaqin kelajakda My Freighter yana beshta Boeing-747 yuk samolyotini sotib olishni, yaqin besh yil ichida esa parkni 20 ta yuk samolyotigacha yetkazishni rejalashtirmoqda. 2022-yilda kompaniya yuk reyslari soni 410 taga yetdi.
My Freighter Xitoyning o‘nta yirik shahrida o‘z omborlariga ega, yuk yig‘ish punktlari Yevropada Chexiya, Lyuksemburg, Germaniya, Fransiya, Italiya va Niderlandiyada, shuningdek, BAAda, Janubiy Koreyada, Rossiya, Braziliya va Vyetnamda joylashgan.
Izoh (0)