Hindistonning Dehli shahrida tutqunlikda qolgan o‘zbekistonlik ayollar vatanga qaytishda yordam so‘rab qilgan videomurojaati ijtimoiy tarmoqlarda tarqaldi. Holatga O‘zbekistonning Hindistondagi elchixonasi munosabat bildirdi.
Rasmiy xabarga ko‘ra, 28-avgust kuni fuqaro D.M. va uning hamrohligida jami 7 nafar O‘zbekiston fuqarosi O‘zbekistonning Hindistondagi elchixonasining konsullik bo‘limiga vatanga qaytarishda ko‘maklashishni so‘rab murojaat qilgan. Elchixona tomonidan mazkur fuqarolarga tezkor ravishda barcha tegishli konsullik-huquqiy yordami ko‘rsatildi.
Xususan, ularning yashash joyi mavjud emasligi va moliyaviy og‘ir ahvolidan kelib chiqib, zudlik bilan Dehli shahrida Empowering Humanity nodavlat tashkiloti bilan hamkorlikda boshpana bilan ta’minlashga erishilib, ularga uch mahal issiq ovqat berib kelinmoqda. O‘z navbatida, murojaat qilgan fuqarolarning shaxsini tasdiqlovchi hujjati bo‘lmaganligini inobatga olib, ularga vatanga qaytish guvohnomasi rasmiylashtirildi.
“Ta’kidlash lozimki, yuqorida qayd etilgan fuqarolar Hindiston huquqni muhofaza qiluvchi idoralari tomonidan Hindiston hududiga noqonuniy yo‘llar bilan kirib kelganliklari va ushbu mamlakatda bo‘lish qoidalarini buzganliklari aniqlangan. Shu bilan birgalikda, videomurojaat muallifi — D.M. va uning hamrohlari masalasida Hindiston huquqni muhofaza qiluvchi idoralari tomonidan tegishli tergov va sud jarayonlari davom etayotgani sababli ularning ushbu davlat hududidan chiqishiga vaqtinchalik cheklov qo‘yilgan. Ushbu huquqiy jarayonlar yakunlangach, yuqoridagi fuqarolar tezkor ravishda O‘zbekistonga qaytarilishi ta’minlanadi”, — deyiladi elchixona xabarida.
Ta’kidlashicha, ushbu masala O‘zbekistonning Hindistondagi elchixonasi tomonidan qat’iy nazoratga olingan va qayd etilgan fuqarolar uchun zarur bo‘lgan tegishli konsullik-huquqiy yordam ko‘rsatilmoqda. Mazkur holat yuzasidan Hindistonning vakolatli idoralari bilan muntazam aloqa o‘rnatilgan.
Izoh (0)