Rossiya mudofaa vaziri Sergey Shoyguning NATO mudofaa vazirlariga qo‘ng‘iroq qilib chiqishdan maqsadi G‘arbning Ukrainaga harbiy ko‘magini sekinlashtirish yoki to‘xtatishdan iborat bo‘lgan. Urushni tadqiq qilish instituti mutaxassislari shunday fikr bildirdi. Ularning qayd etishicha, Rossiya qo‘rquvni alanga oldirib, alyansni zaiflashtirmoqchi.
Shu bilan birga, tashkilot fikricha, Kreml “iflos bomba” bilan muqarrar hujum tayyorlayotgani ehtimoldan uzoq. Shuningdek, Shoyguning bayonotlari Rossiya Ukrainada nostrategik yadro qurolini qo‘llashga tayyorlanayotganidan darak bermaydi.
“Shoyguning qo‘ng‘iroqlari, katta ehtimol bilan, Ukrainaning G‘arbdagi tarafdorlarini qo‘rqitib qo‘yish va NATO alyansida parchalanishni kuchaytirish maqsadida Rossiya tomonidan o‘z qurollarining yana bir marta ko‘z-ko‘z qilinishi bo‘lgan”, — deb yozadi institut tadqiqotchilari.
Eslatib o‘tamiz, Sergey Shoygu 23-oktabr kuni Fransiya, Turkiya, Buyuk Britaniya va AQSH mudofaa vazirlari bilan telefon orqali bog‘langan. Ularning har biri bilan Shoygu Ukrainadagi “nazorat qilib bo‘lmaydigan darajada kuchayib ketishga moyil bo‘lgan” vaziyatni muhokama qilgan. Fransiya, Turkiya va Buyuk Britaniya vakillari bilan muzokaralar chog‘ida, Rossiya Mudofaa vazirligi xabariga ko‘ra, Shoygu “Ukraina tomonidan ‘iflos bomba’ qo‘llangan holda provokatsiyalar amalga oshirilishi ehtimoli yuzasidan o‘z xavotirini” bildirgan.
Ma’lumot uchun: Urushni tadqiq qilish instituti (Institute for the Study of War) — Amerikaning mudofaa va xalqaro masalalar sohasida tadqiqotlar olib boruvchi nohukumat tashkiloti, u Rossiya Ukrainaga bostirib kirganidan buyon frontdagi holatni tahlil qilib boradi.
Izoh (0)