Россия мудофаа вазири Сергей Шойгунинг НАТО мудофаа вазирларига қўнғироқ қилиб чиқишдан мақсади Ғарбнинг Украинага ҳарбий кўмагини секинлаштириш ёки тўхтатишдан иборат бўлган. Урушни тадқиқ қилиш институти мутахассислари шундай фикр билдирди. Уларнинг қайд этишича, Россия қўрқувни аланга олдириб, альянсни заифлаштирмоқчи.
Шу билан бирга, ташкилот фикрича, Кремль «ифлос бомба» билан муқаррар ҳужум тайёрлаётгани эҳтимолдан узоқ. Шунингдек, Шойгунинг баёнотлари Россия Украинада ностратегик ядро қуролини қўллашга тайёрланаётганидан дарак бермайди.
«Шойгунинг қўнғироқлари, катта эҳтимол билан, Украинанинг Ғарбдаги тарафдорларини қўрқитиб қўйиш ва НАТО альянсида парчаланишни кучайтириш мақсадида Россия томонидан ўз қуролларининг яна бир марта кўз-кўз қилиниши бўлган», — деб ёзади институт тадқиқотчилари.
Эслатиб ўтамиз, Сергей Шойгу 23 октябрь куни Франция, Туркия, Буюк Британия ва АҚШ мудофаа вазирлари билан телефон орқали боғланган. Уларнинг ҳар бири билан Шойгу Украинадаги «назорат қилиб бўлмайдиган даражада кучайиб кетишга мойил бўлган» вазиятни муҳокама қилган. Франция, Туркия ва Буюк Британия вакиллари билан музокаралар чоғида, Россия Мудофаа вазирлиги хабарига кўра, Шойгу «Украина томонидан ‘ифлос бомба’ қўлланган ҳолда провокациялар амалга оширилиши эҳтимоли юзасидан ўз хавотирини» билдирган.
Маълумот учун: Урушни тадқиқ қилиш институти (Institute for the Study of War) — Американинг мудофаа ва халқаро масалалар соҳасида тадқиқотлар олиб борувчи ноҳукумат ташкилоти, у Россия Украинага бостириб кирганидан буён фронтдаги ҳолатни таҳлил қилиб боради.
Изоҳ (0)