Turkiya prezidenti Rajab Toyyib Erdo‘g‘on ayollarning hijob o‘rash huquqini konstitutsiyada mustahkamlab qo‘yish masalasini umumxalq referendumiga qo‘yishni taklif qildi. Bu haqda u mamlakat janubi-sharqidagi Malatya shahrida so‘zlagan nutqida ma’lum qildi.

“Bu haqda birinchi marta gapiryapman. Keling, bu masalani referendumga qo‘yaylik, xalq qaror qilsin”, — dedi Erdo‘g‘on asosiy muxolifatdagi Jumhuriyat Xalq partiyasi yetakchisi Kamol Qilichdaro‘g‘lining tegishli qonun loyihasini parlamentga kiritish tashabbusini izohlar ekan.

“Biz hech qachon ayollarimizni ro‘mol o‘ragan va o‘ramaganlarga ajratmaganmiz. Lekin ba’zi odamlar haligacha bu diskriminatsiyani ongida saqlamoqda. Konstitutsiyaga o‘zgartirish kiritishga tayyorgarlikni yakunladik. Endi o‘zgartirishlarni parlamentga yuboramiz”, — deya qo‘shimcha qildi Erdo‘g‘on. Avvalroq u asosiy qonunga ayollarning hijob kiyish huquqlarini ta’minlovchi o‘zgartirishlar tayyorlashni taklif qilgan edi. Mahalliy OAV xabarlariga ko‘ra, Adliya vazirligi bu ishni allaqachon yakunlagan.

Turkiyada referendum oxirgi marta 2017-yilda mamlakatni parlament boshqaruvidan prezidentlik boshqaruv shakliga o‘tkazish uchun konstitutsiyaga o‘zgartirishlar kiritish masalasi bo‘yicha o‘tkazilgan. Mamlakatda bu boshqaruv shakli 2018-yildan beri amalda. Referendum o‘tkazish to‘g‘risidagi qaror parlament tomonidan qabul qilinadi, buning uchun konstitutsiyaviy ko‘pchilikning ovozi (600 ovozdan 330 ta) talab qilinadi.

Erdo‘g‘on avvalroq Turkiyada hijobli ayollar uchun muammo yo‘qligini aytgandi. U rahbarlik qiladigan islomparast Adolat va taraqqiyot partiyasi mamlakatda 20 yildan buyon hukmronlik qilmoqda va davlat muassasalarida musulmonlarga xos kiyimlarni kiyish amalda qonuniylashtirilgan. Avval buni davlatning dunyoviy tuzilmasi tamoyillarining buzilishi deb hisoblagan muxolifatchilar 2023-yil iyuniga belgilangan umumxalq saylovlari arafasida “diniy erkinliklarni qonunchilikda mustahkamlab olish” tashabbusi bilan chiqdi.