Ukraina uchun “Marshall rejasi” zarur, uni hoziroq ishlab chiqishni boshlash kerak, dedi Germaniya kansleri Olaf Shols va Yevrokomissiya rahbari, Germaniya sobiq mudofaa vaziri Ursula fon der Lyayyen Frankfurter Allgemeine Zeitung nashri uchun yozgan maqolasida. Maqola Berlinda Ukrainani qayta tiklash bo‘yicha konferensiya arafasida e’lon qilindi, unda, shu jumladan, Ukraina bosh vaziri Denis Shmigal ham qatnashadi.
Shols va fon der Lyayyen maqolada eslatishicha, Ukraina Yevroittifoqqa a’zo bo‘lish uchun nomzoddir. “Shuning uchun qayta tiklanish sari yo‘l — Ukrainaning Yevroittifoqqa tomon yo‘li hamdir. Ukraina qoidalarga asoslangan xalqaro tartibni, bizning tinchligimiz asosini, butun dunyo taraqqiyotini ham himoya qilmoqda. Shuning uchun biz Ukrainani qo‘llab-quvvatlayotgan bo‘lsak, demak o‘z kelajagimizni, bizning umumiy Yevropamiz kelajagini qurayotgan bo‘lamiz”, — deya qayd etdi siyosatchilar.
Yevrokomissiya rahbari va kansler shuni ham ta’kidladiki, Ukrainani qayta tiklash avlodlar vazifasidir, unga esa bugun kirishish kerak.
“Marshall rejasi” AQSH davlat kotibi Jorj Marshall tomonidan 1947-yil 5-iyunda, uning Garvard universitetidagi nutqi chog‘ida taklif qilingan edi. O‘sha yili Parijda uni muhokama qilish uchun Yevropa mamlakatlari konferensiyasi chaqirildi, ishtirokchilar G‘arbiy Yevropaga zarur bo‘lgan to‘rt yillik kreditlar qiymatini aniqladi. AQSH Kongressi “Marshall rejasi”ni 1948-yilda tasdiqladi. U Chet davlatlarga ko‘mak berish bo‘yicha to‘rt yillik dastur to‘g‘risidagi qonun doirasida amalga oshirildi, umumiy summa 12,4 milliard dollarni tashkil qildi.
Fon der Lyayyen iyun oyida Ukrainaga vayron bo‘lgan infratuzilmani qayta tiklashda yordam berish Yevropaning ma’naviy burchi ekanini aytgandi. Shu bilan birga, Bryussel Ukrainani qayta qurish uchun rossiyalik biznesmenlarning muzlatib qo‘yilgan aktivlaridan foydalanish imkoniyatini ko‘rib chiqmoqda, degan edi fon der Lyayyen.
Izoh (0)