Farg‘onada 20 yil qamoqda o‘tirib chiqqan erkak yana 8 yilga qamaldi

Farg‘onada avvalgi jinoyati uchun 20 yil qamoqda o‘tirib chiqqan erkak qamoqdan qaytgach yana jinoyat sodir etib, jazoni ijro etish muassasasida tanishgan fuqaroni o‘ldirib qo‘ydi. Bu haqda “Sevimli” telekanalining “Zamon” informatsion dasturida xabar qilindi.

Ma’lum qilinishicha, qamoqdan qaytgan qo‘qonlik fuqaro Atatov ukasining uyida yashay boshlagan va uning oldiga jazoni ijro etish muassasasida tanishib qolgan fuqaro Mirzayev mehmonga kelgan. Sobiq mahkumlar suhbatlashib, spirtli ichimlik iste’mol qilgan.

Mehmon mezbonni haqorat qilgani sabab o‘zaro janjallashgan va Atatov uyida bo‘lgan temir bo‘lagi bilan Mirzayevning turli joylariga qasddan urib, og‘ir tan jarohatlari yetkazgan. Uni o‘zboshimchalik bilan davolashga urinib, ikki sutka xonadonida saqlagan.

O‘tkazilgan sudga oid ekspertiza xulosasiga ko‘ra, Mirzayev ko‘krak qafasining ikkala tomonidan to‘qqizta qovurg‘asining sinishi, o‘pka yirtilishi va boshqa turli tan jarohatlari borligi aniqlangan. O‘z vaqtida tibbiy yordam ko‘rsatilmagani sababli jabrlanuvchi xonadonda vafot etgan.

Atatov Jinoyat kodeksining 104-moddasi 3-qismi “d” bandi (qasddan badanga og‘ir shikast yetkazish jabrlanuvchining o‘lishiga sabab bo‘lishi) bilan aybdor deb topilib, unga nisbatan 8 yilga ozodlikdan mahrum etish jazosi tayinlangan.