Bugun, 24-oktabr kuni prezident matbuot kotibi Sherzod Asadov ishtirokida o‘tkazilgan brifingda Shavkat Mirziyoyevning joriy haftadagi ish grafiki haqida ma‘lumot berildi. Bu haqda “Daryo” muxbiri xabar berdi.
“Bugun kunning birinchi yarmida Prezidentimiz Rossiya Federatsiyasi Hukumati raisi o‘rinbosari – sanoat va savdo vaziri Denis Manturov bilan uchrashuv o‘tkazdi. Unda iqtisodiy hamkorlik bo‘yicha qo‘shma hukumatlararo komissiya navbatdagi yig‘ilishining asosiy yakunlari hamda savdo-iqtisodiy
va investitsiyaviy sohalardagi o‘zaro manfaatli hamkorlik loyihalarini ilgari surish masalalari ko‘rib chiqildi”, — dedi Sherzod Asadov.
Uning aytishicha, hafta davomida davlat rahbari Yevropa Kengashi Prezidenti Sharl Mishelni qabul qiladi.
“Uchrashuv kun tartibidan O‘zbekiston va Yevropa Ittifoqining siyosiy, savdo-iqtisodiy va madaniy-gumanitar sohalardagi hakmkorligini muhokama qilish hamda mintaqaviy va xalqaro dolzarb masalalar yuzasisdan fikr almashish o‘rin olgan. Bundan tashqari, hozirda qator xorijiy delegatsiyalar rahbarlari bilan uchrashuvlar tashkil etish masalasi ishlab chiqilmoqda”, — deydi prezident matbuot kotibi.
Ta‘kidlanishicha, 27-oktyabr kuni davlat rahbari “Yevropa Ittifoqi - Markaziy Osiyo” sammitida ishtirok etish uchun Qozog‘iston Respublikasi poytaxti Ostona shahriga tashrif buyuradi.
Shu bilan birga, mazkur ish haftasidan boshlab hudud rahbarlari joylarda ijtimoiy-iqtisodiy rivojlanish borasida amalga oshirilayotgan ishlar bo‘yicha Prezident huzurida hisobot berishni boshlaydi. Shuningdek, sog‘liqni saqlash tizimidagi joriy va kelgusi ustuvor vazifalar yuzasidan muhokamalar rejalashtirilgan.
Izoh (0)