Киевга қурол етказиб бериш орқали НАТО Россия билан тўғридан-тўғри хавфли ҳарбий тўқнашув чизиғига яқинлашмоқда. Бу ҳақда Россия ташқи ишлар вазирлигининг қурол тарқатмаслик ва уларни назорат қилиш ишлари бўйича департаменти директори ўринбосари Константин Воронцов айтиб ўтди, деб хабар бермоқда «РИА Новости».

Унинг сўзларига кўра, альянсга аъзо давлатлар Украина инқирозидаги иштироки ҳақида сукут сақлашни афзал кўрмоқда.«Аммо, ҳақиқатни яшириб бўлмайди: гўё бир-бири билан рақобатлашгандек, улар Киев режимига қурол ва ўқ-дорилар етказишда, уни разведка маълумотлари билан таъминлашда, аскарларини ўқитишда, жанговар ҳаракатларга йўналиш беришда ва шу тариқа Россия билан тўғридан-тўғри хавфли ҳарбий тўқнашув чизиғига яқинлашишда давом этмоқда», — деди Воронцов.

Кил Жаҳон Иқтисодиёти Институтининг ўтган ҳафта эълон қилинган маълумотларига кўра, Ғарбнинг Украинага умумий ҳарбий ёрдами аллақачон 42,3 миллиард долларни ташкил этган. Уларнинг ярмидан кўпи АҚШ улушига тўғри келади, деб таъкидлади дипломат.

Воронцовнинг сўзларига кўра, Европа Иттифоқи ва НАТО мамлакатлари томонидан Украинага қурол-яроғ етказиб берилиши уларни «Россияга қарши тажовузга, шунингдек, Киев режими саккиз йилдан бери тинч аҳолига қарши содир этиб келаётган ҳарбий жиноятлар ва террорчилик ҳаракатларига шерик бўлишига олиб келади».

«Буларга алоқадор барча албатта жавобгарликка тортилади ва жазоланади», — дея ишонч билдирди у.