Agar Vladimir Putin G20 sammitida shaxsan ishtirok etishga qaror qilsa, Indoneziya Rossiya va AQSH prezidentlarining uchrashuvini tashkil etishga tayyor, dedi Indoneziyaning Rossiyadagi elchisi Xose Antonio Morato Tavares “RIA Novosti” agentligiga bergan intervyusida.
“Indoneziya buni amalga oshirishdan juda mamnun bo‘ladi. Biz avval ham shunday qilganmiz. Masalan, Kambodjadagi mojaro paytida Indoneziya Jakartada o‘sha paytda qarama-qarshi bo‘lgan Vyetnam va Kambodja rahbarlarining norasmiy uchrashuvlariga mezbonlik qilgandi. Ular kokteyl bilan boshlagan, biroq munosabatlar rivojiga turtki bergan”, — dedi diplomat.
Uning so‘zlariga ko‘ra, Indoneziya tomoni Putin va Bayden o‘rtasidagi uchrashuv “darhol biror narsani hal qiladi”, deb va’da bera olmaydi, biroq “prezidentlarning o‘zaro oddiy muloqoti muhokamalarni olg‘a siljitishga yordam beradi”.
Indoneziya prezidenti Joko Vidodo Rossiyani sammitga taklif qilish uchun Moskvaga keldi, deya eslatdi elchi. Unga ko‘ra, Putinning ishtiroki haqidagi qaror endi Moskva tomonda qolmoqda.
Kambodjadagi mojaroni hal qilish maqsadida Indoneziyaning tashabbusi bilan 1988-yilda Bogorda va 1989-yilda Jakartada “kokteylli uchrashuvlar” o‘tkazilgan.
Avvalroq AQSH prezidenti Jo Bayden G20 yetakchilarining navbatdagi yig‘ilishida Rossiya prezidenti Vladimir Putin bilan uchrashishni istisno qilmagan edi.
Rossiya tashqi ishlar vaziri Sergey Lavrov esa agar AQSH tomonidan taklif kiritilsa, Kreml G20 sammitida Rossiya va Amerika prezidentlarining uchrashish imkoniyatini ko‘rib chiqishga tayyorligini bildirdi.
Keyinroq Bayden Indoneziyadagi G20 sammitida Rossiya yetakchisi Vladimir Putin bilan uchrashishdan ma’no yo‘qligini aytdi. Baydenning so‘zlariga ko‘ra, uchrashuv haqidagi qaror Putin nima haqida gaplashmoqchi ekanligiga bog‘liq bo‘ladi. Masalan, agar Putin narkotiklar kontrabandasida ayblanayotgan basketbolchi Britni Grinerni ayirboshlashni muhokama qilmoqchi bo‘lsa, u suhbatga rozi bo‘ladi.
Ukraina prezidenti Vladimir Zelenskiy G7 mamlakatlari yetakchilarining onlayn uchrashuvida keskin nutq so‘zlab, G7 davlatlari rahbarlarini Rossiyaning amaldagi rahbari bilan hech qanday muloqot bo‘lishi mumkin emasligi borasidagi aniq haqiqatni tan olishga chaqirdi, chunki Rossiya rahbarining o‘zi Ukrainaning yillar davomida tinchlik muzokaralarini o‘tkazishga urinishlariga qaramay, muloqotni rad etgan.
Izoh (0)