Агар Владимир Путин G20 саммитида шахсан иштирок этишга қарор қилса, Индонезия Россия ва АҚШ президентларининг учрашувини ташкил этишга тайёр, деди Индонезиянинг Россиядаги элчиси Хосе Антонио Морато Таварес «РИА Новости» агентлигига берган интервьюсида.
«Индонезия буни амалга оширишдан жуда мамнун бўлади. Биз аввал ҳам шундай қилганмиз. Масалан, Камбоджадаги можаро пайтида Индонезия Жакартада ўша пайтда қарама-қарши бўлган Вьетнам ва Камбоджа раҳбарларининг норасмий учрашувларига мезбонлик қилганди. Улар коктейл билан бошлаган, бироқ муносабатлар ривожига туртки берган», — деди дипломат.
Унинг сўзларига кўра, Индонезия томони Путин ва Байден ўртасидаги учрашув «дарҳол бирор нарсани ҳал қилади», деб ваъда бера олмайди, бироқ «президентларнинг ўзаро оддий мулоқоти муҳокамаларни олға силжитишга ёрдам беради».
Индонезия президенти Жоко Видодо Россияни саммитга таклиф қилиш учун Москвага келди, дея эслатди элчи. Унга кўра, Путиннинг иштироки ҳақидаги қарор энди Москва томонда қолмоқда.
Камбоджадаги можарони ҳал қилиш мақсадида Индонезиянинг ташаббуси билан 1988 йилда Богорда ва 1989 йилда Жакартада «коктейлли учрашувлар» ўтказилган.
Аввалроқ АҚШ президенти Жо Байден G20 етакчиларининг навбатдаги йиғилишида Россия президенти Владимир Путин билан учрашишни истисно қилмаган эди.
Россия ташқи ишлар вазири Сергей Лавров эса агар АҚШ томонидан таклиф киритилса, Кремль G20 саммитида Россия ва Америка президентларининг учрашиш имкониятини кўриб чиқишга тайёрлигини билдирди.
Кейинроқ Байден Индонезиядаги G20 саммитида Россия етакчиси Владимир Путин билан учрашишдан маъно йўқлигини айтди. Байденнинг сўзларига кўра, учрашув ҳақидаги қарор Путин нима ҳақида гаплашмоқчи эканлигига боғлиқ бўлади. Масалан, агар Путин наркотиклар контрабандасида айбланаётган баскетболчи Бритни Гринерни айирбошлашни муҳокама қилмоқчи бўлса, у суҳбатга рози бўлади.
Украина президенти Владимир Зеленский G7 мамлакатлари етакчиларининг онлайн учрашувида кескин нутқ сўзлаб, G7 давлатлари раҳбарларини Россиянинг амалдаги раҳбари билан ҳеч қандай мулоқот бўлиши мумкин эмаслиги борасидаги аниқ ҳақиқатни тан олишга чақирди, чунки Россия раҳбарининг ўзи Украинанинг йиллар давомида тинчлик музокараларини ўтказишга уринишларига қарамай, мулоқотни рад этган.
Изоҳ (0)