Америкалик бизнесмен Илон Маск Twitter’ни сотиб олса, компания ходимларининг 75 фоизини ишдан бўшатмоқчи. Бу ҳақда The Washington Post (WP) манбалар ва корпоратив ҳужжатларга таяниб хабар бермоқда.
Қайд этилишича, Маск билан келишув амалга ошмаган тақдирда ҳам Twitter’да кенг кўламли ишдан олишлар бўлиши кутилмоқда.
WP маълумотларига кўра, Twitter 7 500 ходимга эга. Агар Илон Маскнинг режаси амалга ошса, у ҳолда компанияда 2 мингга яқин ходим ишлайди.
Аммо келишув муваффақиятсизликка учраган тақдирда ҳам, Twitter’нинг ҳозирги раҳбарияти келаси йил охиригача иш ҳақи фондини тахминан 800 миллион долларга қисқартиришни режалаштирган.
Бу ходимларнинг деярли тўртдан бир қисмини ишдан бўшатишини англатади. Компания, шунингдек, инфратузилмасини, жумладан, маълумот марказларини қисқартириш ниятида.
Маскнинг Twitter’ни сотиб олиш режалари апрель ойида оммага маълум бўлганди, бироқ у июль ойида таклифни қайтариб олди.
Битим тўхтатилгани сабабли Twitter бизнесмен устидан судга мурожаат қилган. Октябр ойида Илон Маск ижтимоий тармоқни сотиб олиш бўйича келишувни якунлашга қарор қилди. Суд унга 28 октябргача вақт берди.
Аввалроқ Илон Маск Tesla капиталлашуви Apple ва Saudi Aramco компанияларининг умумийсидан ошиб кетишини айтганди.
Изоҳ (0)