“Daryo” nashri 21-oktabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Shavkat Mirziyoyevning Turkmanistonga tashrifi Toshkentning Markaziy Osiyo mintaqasidagi mavqeyi mustahkamlanganining yana bir yorqin dalilidir — ozarbayjonlik ekspert Ilgar Velizade
“Janubiy Kavkaz” siyosatshunoslar klubi rahbari (Ozarbayjon) Ilgar Velizade O‘zbekiston Prezidenti Shavkat Mirziyoyevning Turkmanistonga tashrifi borasida fikr bildirdi. “O‘zbekiston Respublikasi prezidenti Shavkat Mirziyoyevning Turkmanistonga tashrifi – rasmiy Toshkentning Markaziy Osiyo mintaqasidagi pozitsiyasi kuchayib borayotganiga yana bir yorqin dalildir.
Bu – mamlakat tashqi siyosati samarasining namoyon bo‘lishi hamdir. Aytish kerakki, mazkur jarayonda aynan O‘zbekiston tomoni tashabbuskorlik ko‘rsatmoqda.
20-oktabrda Rasmiy tashrif bilan Turkmanistonga borgan Shavkat Mirziyoyev Turkmaniston prezidenti Serdar Berdimuhammedov bilan Strategik sheriklikni chuqurlashtirish tog'risidagi deklaratsiyani imzoladi
Zelenskiy Rossiya Xersondagi Kaxovka GESda terakt tayyorlayotganini aytdi
Rossiya harbiylari Xerson viloyatidagi Kaxovka gidroelektr stansiyasida terakt tayyorlamoqda, deb ma’lum qildi Ukraina prezidenti Vladimir Zelenskiy.
“Bizdagi ma’lumotlarga ko‘ra, Kaxovka GES bloklari va dambasi Rossiya terrorchilari tomonidan minalashtirilgan”, — dedi Ukraina prezidenti urushning 239-kuni yakunlari bo‘yicha xalqqa murojaatida.20-oktabr kuni u Bryusseldagi Yevropa kengashi yig‘ilishida onlayn ishtiroki davomida ham shu haqda gapirgan. Uning so‘zlariga ko‘ra, Rossiya armiyasi nazorati ostidagi Kaxovka GESning dambasida taxminan 18 million kub metr suv bor va agar u portlatib yuborilsa, 80 dan ortiq aholi punktlari, jumladan Xerson ham qisqa vaqtda suv ostida qoladi. Zelenskiy jahon hamjamiyatini ehtimoliy teraktga oldindan javob berishga hamda GESga xalqaro kuzatuv missiyasini yuborishga chaqirdi.
AQSH Ilon Maskning Ukraina haqidagi gaplaridan keyin unga nisbatan tekshiruv o‘tkazmoqchi — Bloomberg
AQSH prezidenti Jo Bayden ma’muriyati sayyoradagi eng boy odam — Ilon Maskning xatti-harakatlari milliy xavfsizlikka tahdid solish-solmasligini tekshirish masalasini muhokama qilishni boshladi. Bu haqda Bloomberg agentligi o‘z manbalariga tayanib xabar berdi.
Ularning so‘zlariga ko‘ra, hukumat, xususan, Twitter ijtimoiy tarmog‘ini sotib olish bo‘yicha bitimni (unda Maskdan tashqari yana bir guruh chet el investorlari qatnashmoqda), shuningdek, biznesmenning Ukrainada Starlink sun’iy yo‘ldosh tarmog‘i faoliyati bo‘yicha bayonotlarini tekshirishni ko‘zda tutmoqda.
Bloomberg manbalari qayd etishicha, yaqinda Mask Ukrainaga Starlink sun’iy yo‘ldosh aloqasini yetkazib berishni to‘xtatish haqida tahdid qilganidan keyin amerikalik mansabdorlar xavotirga tushgan. Shuningdek, biznesmen “prezident Vladimir Putin uchun manfaatli bo‘lgan sulh takliflari bayon etilgan ketma-ket tvitlaridan keyin, Rossiyaga nisbatan tobora do‘stona pozitsiyani” egallayotganidan tashvishga tushgan.
Bloomberg ta’kidlashicha, muhokamalar boshlang‘ich bosqichda. Amerikalik mansabdorlar va razvedka xizmatlari agar Maskning xatti-harakatlarini tekshirishga qaror qilinsa, qanday vositalardan foydalanish mumkin bo‘lishi haqida bosh qotirmoqda. Maskning bitimlari va operatsiyalarini AQSHning chet el investitsiyalari bo‘yicha qo‘mitasi tekshiradi, degan variant ko‘rib chiqilmoqda.
Izoh (0)