«Дарё» нашри 21 октябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Шавкат Мирзиёевнинг Туркманистонга ташрифи Тошкентнинг Марказий Осиё минтақасидаги мавқейи мустаҳкамланганининг яна бир ёрқин далилидир — озарбайжонлик эксперт Илгар Велизаде
«Жанубий Кавказ» сиёсатшунослар клуби раҳбари (Озарбайжон) Илгар Велизаде Ўзбекистон Президенти Шавкат Мирзиёевнинг Туркманистонга ташрифи борасида фикр билдирди. «Ўзбекистон Республикаси президенти Шавкат Мирзиёевнинг Туркманистонга ташрифи – расмий Тошкентнинг Марказий Осиё минтақасидаги позицияси кучайиб бораётганига яна бир ёрқин далилдир.
Бу – мамлакат ташқи сиёсати самарасининг намоён бўлиши ҳамдир. Айтиш керакки, мазкур жараёнда айнан Ўзбекистон томони ташаббускорлик кўрсатмоқда.
20 октябрда Расмий ташриф билан Туркманистонга борган Шавкат Мирзиёев Туркманистон президенти Сердар Бердимуҳаммедов билан Стратегик шерикликни чуқурлаштириш тоғрисидаги декларацияни имзолади
Зеленский Россия Херсондаги Каховка ГЭСда теракт тайёрлаётганини айтди
Россия ҳарбийлари Херсон вилоятидаги Каховка гидроэлектр станциясида теракт тайёрламоқда, деб маълум қилди Украина президенти Владимир Зеленский.
«Биздаги маълумотларга кўра, Каховка ГЭС блоклари ва дамбаси Россия террорчилари томонидан миналаштирилган», — деди Украина президенти урушнинг 239-куни якунлари бўйича халққа мурожаатида.20 октябрь куни у Брюсселдаги Европа кенгаши йиғилишида онлайн иштироки давомида ҳам шу ҳақда гапирган. Унинг сўзларига кўра, Россия армияси назорати остидаги Каховка ГЭСнинг дамбасида тахминан 18 миллион куб метр сув бор ва агар у портлатиб юборилса, 80 дан ортиқ аҳоли пунктлари, жумладан Херсон ҳам қисқа вақтда сув остида қолади. Зеленский жаҳон ҳамжамиятини эҳтимолий терактга олдиндан жавоб беришга ҳамда ГЭСга халқаро кузатув миссиясини юборишга чақирди.
АҚШ Илон Маскнинг Украина ҳақидаги гапларидан кейин унга нисбатан текширув ўтказмоқчи — Bloomberg
АҚШ президенти Жо Байден маъмурияти сайёрадаги энг бой одам — Илон Маскнинг хатти-ҳаракатлари миллий хавфсизликка таҳдид солиш-солмаслигини текшириш масаласини муҳокама қилишни бошлади. Бу ҳақда Bloomberg агентлиги ўз манбаларига таяниб хабар берди.
Уларнинг сўзларига кўра, ҳукумат, хусусан, Twitter ижтимоий тармоғини сотиб олиш бўйича битимни (унда Маскдан ташқари яна бир гуруҳ чет эл инвесторлари қатнашмоқда), шунингдек, бизнесменнинг Украинада Starlink сунъий йўлдош тармоғи фаолияти бўйича баёнотларини текширишни кўзда тутмоқда.
Bloomberg манбалари қайд этишича, яқинда Маск Украинага Starlink сунъий йўлдош алоқасини етказиб беришни тўхтатиш ҳақида таҳдид қилганидан кейин америкалик мансабдорлар хавотирга тушган. Шунингдек, бизнесмен «президент Владимир Путин учун манфаатли бўлган сулҳ таклифлари баён этилган кетма-кет твитларидан кейин, Россияга нисбатан тобора дўстона позицияни» эгаллаётганидан ташвишга тушган.
Bloomberg таъкидлашича, муҳокамалар бошланғич босқичда. Америкалик мансабдорлар ва разведка хизматлари агар Маскнинг хатти-ҳаракатларини текширишга қарор қилинса, қандай воситалардан фойдаланиш мумкин бўлиши ҳақида бош қотирмоқда. Маскнинг битимлари ва операцияларини АҚШнинг чет эл инвестициялари бўйича қўмитаси текширади, деган вариант кўриб чиқилмоқда.
Изоҳ (0)