Zoir Mirzayev qabulida bo‘lgan 88 yoshli otaxon sobiq hokim tomonidan yeri olib qo‘yilganini, biroq kompensatsiya berilmayotganini ma’lum qildi

Toshkent viloyati hokimi Zoir Mirzayevning Bo‘stonliq tumanida bo‘lib o‘tgan sayyor qabulida 88 yoshli otaxon 8 sotix yeri sobiq hokim tomonidan olib qo‘yilib, sotib yuborilganini, biroq yeri uchun shu paytga qadar kompensatsiya to‘lab berilmaganini ma’lum qildi. Bu haqda Zoir Mirzayevning jonli efirda namoyish qilib turilgan navbatdagi qabulida so‘z bordi.

1935-yil Qibray tumanida tug‘ilganman. Hozirda Chirchiq shahrida yashayman. Viloyatning sobiq hokimi Shukrullo Boboyev vaqtida menga 8 sotix yer bergandi. U yerga ko‘chat ekib, daraxt o‘stirib, ancha mehr bergandim. 2018-yil Rashidov degan hokim o‘sha yerimni olib qo‘yib sotib yuborgan ekan. Men bu bo‘yicha viloyatning sobiq hokimi Davron Hidoyatovga murojaat qilgandim. U faqat meni aldab keladi. Yerim uchun shu paytgacha na kompensatsiya oldim va na yer, — deydi otaxon.

88 yoshli otaxon Mirzakarim buva Qo‘chqorov viloyat hokimi Zoir Mirzayevga u yashayotgan joyga borishi kerakligini, adolatsizlik bo‘layotganini ko‘rsatmoqchi ekanini aytadi.

Chirchiq shahri ilmga yo‘q, kutubxonani yo‘q qilib yubordi. Uyimiz oldidagi chiroqni o‘chirib, yo‘q qilgan. Ko‘chamiz zimiston. Bobur haykalining oldida birorta gul yo‘q. Amir Temur haykali qani? Alisher Navoiy haykali chang bo‘lib yotibdi. Nahotki shuni tozalab qo‘yadigan odam yo‘q, — deydi otaxon viloyat rahbariga murojaat qilar ekan.

Otaxon gaplari so‘ngida Zoir Mirzayev bilan rasmga tushmoqchiligini aytib, uning murojaatini ham gazetada yoritishlarini so‘radi.

Hokimlik axborot xizmatining qo‘shimcha qilishicha, qabul 5 soat davom etgan. Unda Zoir Mirzayev 117 nafar fuqaro bilan muloqot qilgan.

Qonunchilikda belgilangan tartibda masala va muammolar muhokama qilindi, — deyiladi hokimlik axborotida.