“Nogironligi bo‘lgan shaxslar himoyasi davlat e’tiboridagi masala” — Tanzila Norboyeva

Nogironligi bo‘lgan shaxslar himoyasi davlat e’tiboridagi masala, ammo ular uchun ijtimoiy obyektlar va jamoat transportlarida yetarlicha sharoit yaratilmagan. Bu haqda Senat raisi Tanzila Norboyeva parlament yuqori palatasi kengashining navbatdagi majlisida aytib o‘tdi.

Senat axborot xizmatining “Daryo”ga ma’lum qilishicha, Tanzila Norboyeva nogironligi bor insonlarga barcha zarur shart-sharoitlarni yaratish dolzarb masala ekanini ta’kidlagan.

Nogironligi bo‘lgan shaxslar himoyasi davlat e’tiboridagi masala. Lekin shu bilan birga mazkur sohada, ayniqsa xalqaro mezonlarning talablaridan kelib chiqib, mamlakatda “to‘siqsiz muhit”ni shakllantirish masalalariga yanada jiddiy e’tibor qaratishimiz lozim. Bu borada yetarlicha muammolarimiz bor. Oddiygina kundalik hayotimizda bunday masalalarga ko‘plab duch kelamiz – transportda, ovqatlanish shoxobchalarida, xizmat ko‘rsatish obyektlarida, madaniy – ko‘ngilochar muassasalarda (teatr, kino, muzey va boshqalar) nogironligi bor shaxslar uchun sharoitlar yaratilmagan. Albatta bu vazifaning yechimi bir-ikki kunning ishi emas. Lekin bu yo‘nalishda amaliy harakatlarni boshlash vaqti allaqachon kelgan.

E’tiborlisi, joriy yilning fevral oyida Barqaror rivojlantirish sohasidagi milliy maqsadlar va vazifalarning amalga oshirilishini nazorat qilish bo‘yicha Parlament komissiyasi majlisi doirasida ham mazkur muammolarga to‘xtalib o‘tgandik. Xususan, jamoat transportidagi noqulayliklar, jumladan metropolitendan erkin foydalanishdagi to‘siqlar, uning qaysi bekatlari moslashtirilgani to‘g‘risida ma’lumotlarni yetishmasligi va boshqa qator muammolar muhokama qilingandi. Hozirgi o‘rganish yakunlari ham mazkur masalalar hali hamon dolzarb bo‘lib turganini ko‘rsatmoqda.

Bu muammolarni bartaraf etish uchun zarur barcha imkoniyatlar ishga solinishi lozim. Har bir idora, vazirlik o‘z funksional yo‘nalishi doirasida mazkur muammolar yuzasidan nafaqat taklif kiritishi, balki muammoning  yechimini ham berishi zarur. Albatta, nogironligi bo‘lgan shaxslar uchun “to‘siqsiz muhit” yaratish va ularning barcha iqtisodiy-ijtimoiy shart-sharoitlarini ta’minlash, shu jumladan, ularni kasbga tayyorlash va hunar o‘rgatish, mazkur shaxslarning va ularning farzandlari salomatligi kabi masalalar davlatning zimmasidagi vazifasidir. Shu bilan birga, bunday yurtdoshlarimiz bilan bog‘liq muammolarni hal etishda daxldorlik hissi jamiyatimizning har bir a’zosida bo‘lishi muhim. Qachonki, mana shu 800 ming yurtdoshimiz ham jamiyatimizning to‘laqonli, teng a’zosi ekanini davlatning va atrofidagi insonlarning ko‘magida, o‘z turmushi sifati o‘zgarganida, yaxshilanganida ko‘rsin.