Oliy Majlis Senati kengashining 21-oktabr kuni bo‘lib o‘tgan navbatdagi majlisida shaharsozlikda nogironligi bo‘lgan shaxslarga inklyuziv sharoitlar yaratish masalasi ko‘rib chiqildi.
Yig‘ilishda shaharsozlikda nogironligi bo‘lgan shaxslarning ehtiyojlarini ta’minlash hamda barcha ijtimoiy infratuzilma obyektlaridan moneliksiz foydalanish uchun moslashtirish borasidagi ishlar muhokama qilindi. Senat raisi Tanzila Norboyeva olib borgan mazkur majlisda senatorlar, tegishli vazirlik va idoralar, hokimliklar vakillari hamda OAV xodimlari ishtirok etdi.
Ta’kidlanganidek, Toshkent shahrida, shu jumladan, “Obod mahalla” dasturi doirasidagi qurilish va loyihalash ishlari 2008-yilda qabul qilingan “Insonlarning hayoti va faoliyati muhitini nogironlar ehtiyojlari va aholining kam harakatlanuvchi guruhlarini hisobga olgan holda loyihalash” to‘g‘risidagi qurilish me’yorlari va qoidalariga qat’iy rioya qilingan holda amalga oshirilmoqda.
Shunday bo‘lsa-da, ko‘rilayotgan choralarga qaramay, nogironligi bo‘lgan shaxslarga inklyuziv sharoitlar yaratish masalasida qator muammolar saqlanib qolmoqda. Birgina poytaxtning o‘zida ijtimoiy infratuzilmasi obyektlari va binolarining 85 foizi hanuzgacha nogironlar to‘siqsiz foydalanishga moslashtirilmagan.
Bu xususda Senat raisi ayniqsa xalqaro mezonlar talablaridan kelib chiqib, mamlakatda “to‘siqsiz muhit”ni shakllantirish masalalariga jiddiy e’tibor qaratish lozimligiga to‘xtaldi.
Bu borada yetarlicha muammolarimiz bor. Oddiygina kundalik hayotimizda bunday masalalarga ko‘plab duch kelamiz – transportda, ovqatlanish shoxobchalarida, xizmat ko‘rsatish obyektlarida, madaniy-ko‘ngilochar muassasalarda nogironligi bo‘lgan shaxslar uchun qulay sharoitlar yaratilmagan. Albatta, bu vazifa yechimi ham bir-ikki kunning ishi emas. Lekin bu yo‘nalishda amaliy harakatlarni boshlash vaqti allaqachon kelgan, — dedi Norboyeva.Shuningdek, majlis davomida mavjud kamchiliklar aniq misollar bilan izohlandi. Jumladan, yerosti transportidan qulay foydalanish uchun to‘liq sharoitlar yaratilmagan. Metro stansiyalarning ko‘plari panduslar bilan jihozlanmagan, bu esa shaharsozlik me’yorlari talablariga javob bermaydi.
Nogironligi bo‘lgan shaxslar tomonidan shahar yerusti transportidan mustaqil foydalanish imkoniyati to‘liq yaratilmagan. Ayniqsa, aravachalar yordamida harakatlanadigan nogironligi bo‘lgan shaxslar, ko‘zi ojizlar va qulog‘i og‘irlarning erkin harakatlanishi uchun jamoat transportining moslashmagani aytib o‘tildi.
Jamoat joylarida nogironligi bo‘lgan shaxslar uchun zarur eshitish va ko‘rish ma’lumotlari, shu jumladan, relyef nuqtali Brayl shriftida tayyorlangan ko‘rsatkich va belgilar mavjud emas. Majlisda shu va boshqa bir qator holatlar yuzasidan mas’ul tashkilot vakillarining munosabatlari eshitildi va ushbu holatlarni bartaraf etish yuzasidan tegishli vazifalar belgilandi.
Qurilish va rekonstruksiya obyektlarini davlat qabul komissiyalari tarkibiga Nogironlar jamiyati, Nogironlar uyushmasi, Karlar jamiyati va Ko‘zi ojizlar jamiyati vakillarini kiritish, nogironligi bo‘lgan shaxslar tomonidan ko‘p foydalaniladigan amaldagi ijtimoiy va transport infratuzilma obyektlarini rekonstruksiya qilish masalalarini o‘rganish hamda jamoat avtobuslarini nogironlarning ehtiyojidan kelib chiqib bosqichma-bosqich yangilash masalalarini ko‘rish shular jumlasidandir.
Ushbu vazifalar yuzasidan aniq muddatlar belgilanib, majlis yakunida Senat kengashining tegishli qarori qabul qilindi.
Ma’lumot uchun, bugungi kunda mamlakatda 800 mingdan ortiq nogironligi bor shaxslar mavjud.
Izoh (0)