АҚШнинг Миссисипи штатида болалар боғчасининг беш нафар собиқ ходимига болаларга шафқатсиз муносабатда бўлиш айблови эълон қилинди, деб хабар беради New York Post. Аввалроқ интернетда ходимлар Scream («Қичқириқ») фильмидаги ниқобларни кийиб, болаларни қўрқитаётгани акс этган видео тарқалиб, шов-шувга сабаб бўлган эди.
Lil’ Blessings болалар муассасаси ишчилари ўзларини «ёмон» тутган баъзи болаларни қўрқитиб қўймоқчи бўлган, деб ёзди вазиятдан хабардор одамлардан бири.
Хавотир уйғотувчи ушбу видеолавҳа Штат Соғлиқни сақлаш департаменти ва Монро округи шерифи идорасига суриштирув бошлашга туртки берди, унинг натижасида эса беш кишига айбловлар эълон қилинди.
Ходимларнинг тўрт нафари болаларга шафқатсиз муносабатда бўлиш бўйича учтадан банд билан айбланмоқда. Яна бир ходимга эса шафқатсиз муносабат ҳақида хабар бермаганлик ва вояга етмаган шахсга оддий ҳужум айблови қўйилган.
Болалар боғчасининг хўжайини Шейла Сандерс воқеадан хабар топиши билан унга алоқадор ходимларни ишдан бўшатиб юборганини маълум қилган. Унинг айтишича, бундай ҳодиса сентябрда ҳам қайд этилган, аммо видео ижтимоий тармоқларда пайдо бўлмагунича, улардан хабардор бўлмаган.
Болалар боғчаси ишчиларидан бири айтишича, ушбу хатти-ҳаракат «ёмон ниятда» қилинмаган.
«Ўқитувчилар мендан бу нарсани қиласанми ёки болаларни итоат қилишга ва тозалашга мажбурлаш учун ниқобдан фойдалансак бўладими, деб сўраганди. Мен болаларга нисбатан зўравон эмасман», — деди у. У болаларни қўрқитиш режасини ишлаб чиққанини, лекин бу ҳақда Сандерсни хабардор қила олмаганини қўшиб қўйди.
Изоҳ (0)