Toshkent viloyatida piyodalar o‘tish yo‘lagini ta’mirlash uchun ajratilgan pullar o‘zlashtirilgani aniqlandi

Toshkent, Qashqadaryo va Navoiy viloyatlarida qurilish materiallarini talon-toroj qilingani aniqlandi.

Bosh prokuratura huzuridagi departamentning Yangiyo‘l shahar bo‘limi tomonidan o‘tkazilgan tergovga qadar tekshiruvda, “K.Q.” MCHJ tomonidan yerusti piyodalar o‘tish yo‘lagini ta’mirlashda 579,6 million so‘mga sotib olingan qurilish materiallarini ta’mirlashga ishlatilmasdan, o‘zlashtirish yo‘li bilan talon-toroj qilingani aniqlangan.

Shu kabi departamentning Chiroqchi tuman bo‘limi tomonidan o‘tkazilgan tergovga qadar tekshiruvda tuman obodonlashtirish boshqarmasining sobiq rahbari M.S., bosh hisobchisi B.N. va boshqalar “H.M.” MCHJga yetkazib berilmagan avtoehtiyot qismlari uchun 100 million so‘m, piyodalar yo‘lakchasini chiroqlar bilan bezatish uchun 40,4 million so‘m, “E.T.” MCHJ bilan tuzilgan shartnomaga asosan ichimlik suvi inshootini qurishda bajarilmagan ish hajmlarni qo‘shib yozish orqali 195,1 million so‘m, jami 335,1 million so‘mni o‘tkazib bergani aniqlangan.

Departamentning Konimex tuman bo‘limi tomonidan o‘tkazilgan tergovga qadar tekshiruvda esa, “N.S.” MCHJ rahbari M.Sh. 1 so‘m qiymatda auksionga chiqarilgan 14-sonli maktabning eski binosini yutib olib, investitsiya majburiyatini bajarmasdan, binoning 199,8 million so‘mlik yaroqli qurilish materiallarini o‘z ehtiyojlari uchun ishlatib yuborgani aniqlangan.

Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish), 209-moddasi (mansab soxtakorligi) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishlari qo‘zg‘atilib, tergov harakatlari o‘tkazilmoqda.