“Daryo” nashri 20-oktabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Rossiya Suriyadagi havo mudofaasi va harbiy kuchlarini Ukrainaga olib o‘tdi — The New York Times
Rossiya muhim harbiy texnika va kuchlarini Suriyadan Ukrainaga o‘tkazdi, deb xabar beradi The New York Times Yaqin Sharqdagi yuqori lavozimli manbalariga tayanib.
Nashr suhbatdoshlariga ko‘ra, S-300 komplekslari va mingdan ortiq askarlar Suriyadan Ukrainaga olib kelingan. Shuningdek, NYTning ikki manbasi Suriyadan Ukrainaga ikkita batalyon (1200-1600 kishi) jo‘natilishi haqida aytgan bo‘lsa, yana biri askarlarning soni bundan ko‘proqligini iddao qilmoqda.
Gazetaning ta’kidlashicha, S-300 va Rossiya qo‘shinlarining bir qismini olib chiqib ketish Isroilning harakatlariga ta’sir qilishi mumkin. Manbalarning fikricha, uning Ukraina armiyasini qurol-yarog‘ bilan ta’minlashdan bosh tortishi qisman ruslar Suriyadagi Isroil samolyotlariga qarshi S-300 dan foydalana olishidan cho‘chish bilan bog‘liq. Yana bir sabab Rossiya Isroil fuqarolariga mamlakatdan chiqib ketishni taqiqlab qo‘yishidan qo‘rqishdir.
Avvalroq Isroil hukumati Ukrainaga qurol bermasligi, ammo raketa hujumidan ogohlantirish tizimida yordam berishga tayyor ekanligi haqida xabar qilingan edi.
Zelenskiy Qrim ko‘prigidagi teraktning buyurtmachisi Kiyev emasligini ta’kidladi
Ukraina yetakchisi Vladimir Zelenskiy o‘z intervyusida Kiyev Qrim ko‘prigidagi teraktning buyurtmachisi emasligini aytdi. “Bilishimcha, biz buni buyurmaganimiz aniq”, — dedi u Ukrainaning voqeaga aloqadorligini rad etib.
Avvalroq Kiyev viloyati harbiy ma’muriyati rahbari Oleksiy Kuleba Ukraina bo‘ylab havo hujumi haqida ogohlantirish e’lon qilib, aholini boshpanalarda qolishga chaqirgan. Ayni vaziyatda Vinnitsa, Chernigov va Kiyev viloyatlari raketa hujumi ostida qolgan.
Britaniya bosh vaziri Liz Trass iste’foga chiqishini ma’lum qildi
Buyuk Britaniyaning 2022-yil 5-sentabrda saylangan bosh vaziri Liz Trass iste’foga chiqishini e'lon qildi, deb yozadi “RBK”. Trass so‘zlariga ko‘ra, u o‘z keyingi vazir aniqlanmaguncha o‘z vazifalarini bajarishda davom etadi. Bu boradagi saylovlar kelasi haftada bo‘lib o‘tadi
Qaror Britaniya iqtisodidagi inqiroz va uning kabinetidagi bir qancha muhim vazirlarning ketishi fonida qabul qilindi. U 45 kun bosh vazir lavozimida ishladi. O‘z navbatida, u Britaniya bosh vaziri sifatida 21-asrda eng kam faoliyat yuritgan shaxs sifatida o‘ziga xos antirekord qayd etdi.
“Men ulkan iqtisodiy inqirozlar va xalqaro g‘alayonlar davrida lavozimga kirishdim”, — deya o‘z nutqini tugalladi Liz Trass.
Yevroittifoq 3 nafar eronlik general va dron ishlab chiqaruvchi Shahed kompaniyasiga nisbatan sanksiyalar joriy qildi
Yevropa Ittifoqi Eronning Shahed dron ishlab chiqaruvchi Shahed Aviation Industries kompaniyasiga hamda Islom Respublikasining uch generaliga qarshi sanksiyalar kiritdi, deb yozadi “Life.ru”.
“Eron rejimi Rossiyaning Ukrainaga qarshi asossiz va o‘rinsiz tajovuziga harbiy yordam ko‘rsatmoqda. Vaziyatning og‘irligini hisobga olib, Yevroittifoq Kengashi Rossiyaga dronlarni yetkazib berish bilan bog‘liq uch shaxs va bir tashkilotni ham sanksiyalar ro‘yxatiga kiritishga qaror qildi”, — deyiladi xabarda.
Avvalroq AQSH Davlat departamenti Eronga qarshi yangi sanksiyalar joriy etilishi mumkinligi bilan tahdid qilgandi. Vashingtonda bunga sabab sifatida Tehronning Rossiyaga “xavfli qurol” yetkazib berayotganini ko‘rsatgan.
“O‘zbekka nihoyatda achinyapman” — O‘zbekiston xalq shoiri Usmon Azim jamiyatda savodsizlik avj olgani haqida
Jamiyatda kitobxonlik yo‘qolib bormoqda. Bu haqda O‘zbekiston xalq shoiri Usmon Azim kitoblar taqdimotida aytib o‘tdi, deya xabar bermoqda “Daryo” muxbiri.
Tirik iste’mol jamiyatiga aylanib bo‘libsiz. Kitobdan tashqari hamma narsani sotib olishadi. Qorin to‘ysa, to‘y qilsa bo‘ldi. Boshpanani ham, albatta, o‘ylashsa kerak.Ijodkorning qo‘shimcha qilishicha, maktablarda ta’lim sifati pastligi sabab ko‘p o‘quvchilar savodsiz bo‘lib qolmoqda. “Bir sinfda 30 nafar o‘quvchi bo‘lsa, shundan 4-5 nafari a’lochi, 4-5 nafari hech narsani tushunmaydigan bilimsiz bo‘lishi mumkin. Lekin hozirgidek yoppasiga savodsiz bolalarni birinchi ko‘rishim”, — degan Usmon AzimHozir odamlarga kallani ishlatadigan narsa kerak bo‘lmay qoldi. Yaqinda institutga o‘qishga kirmoqchi bo‘lgan yoshlardan imtihon oldim. Menga yuzma-yuz kelgan abituriyentlarning bitta ham kitob o‘qimaganlari bor edi. Eng yomoni, bundaylari juda ko‘p. Kitob odamni o‘stiradi. Kitoblarda ilm, did, ruh va qalb jamlangan.
Izoh (0)