Rossiya muhim harbiy texnika va kuchlarini Suriyadan Ukrainaga o‘tkazdi, deb xabar beradi The New York Times Yaqin Sharqdagi yuqori lavozimli manbalariga tayanib.
Nashr suhbatdoshlariga ko‘ra, S-300 komplekslari va mingdan ortiq askarlar Suriyadan Ukrainaga olib kelingan.
Shuningdek, NYTning ikki manbasi Suriyadan Ukrainaga ikkita batalyon (1200-1600 kishi) jo‘natilishi haqida aytgan bo‘lsa, yana biri askarlarning soni bundan ko‘proqligini iddao qilmoqda.
Isroil rasmiysining aytishicha, Suriyada jang qilgan bir necha rossiyalik qo‘mondon ham Ukrainaga yuborilgan. Shuningdek, u Moskvadagi Rossiya harbiy rahbariyati mintaqadagi operatsiyalarni kundalik boshqarishda kamroq ishtirok etganini qayd etdi. Shunday qilib, Rossiya Isroilga nisbatan harbiy muvofiqlashtirish bilan kamroq band bo‘lgan.
Gazetaning ta’kidlashicha, S-300 va Rossiya qoshinlarining bir qismini olib chiqib ketish Isroilning harakatlariga ta’sir qilishi mumkin. Manbalarning fikricha, uning Ukraina armiyasini qurol-yarog‘ bilan ta’minlashdan bosh tortishi qisman ruslar Suriyadagi Isroil samolyotlariga qarshi S-300 dan foydalana olishidan cho‘chish bilan bog‘liq. Yana bir sabab, Rossiya Isroil fuqarolariga mamlakatdan chiqib ketishni taqiqlab qo‘yishidan qo‘rqishdir.
Avvalroq Isroil hukumati Ukrainaga qurol bermasligi, ammo raketa hujumidan ogohlantirish tizimida yordam berishga tayyor ekanligi haqida xabar qilingan edi.
Izoh (0)