Qoraqalpog‘iston xalq ta’limi vaziri Axmed Narimbetov va maktabgacha ta’lim vaziri Gulzira Baxiyevaga hayfsan berildi. Bu haqda Vazirlar Kengashining farmoyishi qabul qilingan.
Farmoyishga ko‘ra, ikkala vazir Qoraqalpog‘istonda 2022/2023-yillar kuz-qish mavsumida amalga oshirilishi belgilangan chora-tadbirlarning ijrosini o‘z vaqtida ta’minlamagan. Shuningdek, ijtimoiy soha obyektlarini mavsumga tayyorlashda o‘z xizmat vazifalariga mas’uliyatsizlik bilan yondashgan.
Qo‘shimcha qilinishicha, kapital ta’mirlash ishlari belgilangan 4 ta umumta’lim maktablarida ishlar oxiriga yetkazilmagan. 6 ta maktabgacha ta’lim tashkilotlarida joriy ta’mirlash ishlari yakunlanmagan.
Taxtako‘pir tumanidagi 3-sonli maktabgacha ta’lim tashkilotida kuz-qish mavsumi boshlangan bo‘lishiga qaramay, isitish qozonlarini almashtirish va ichki isitish tizimlarini ta’mirlash ishlari shu kunga qadar yakuniga yetkazilmagan.
Ma’lumot uchun, Nukusdagi shaxmat musobaqasi g‘oliblariga futbolka va mayka sovg‘a qilingani kulgiga sabab bo‘lgach, Qoraqalpog‘iston Xalq ta’limi vazirligi tomonidan elektr pech ham berilgandi.
Bir muddat avval Qoraqalpog‘iston transport vaziriga nisbatan intizomiy chora qo‘llangandi. Undan oldin esa Qoraqalpog‘iston rahbari 2 nafar vazir va 7 nafar hokimni ogohlantirib, ularga yil yakuniga qadar imkoniyat bergandi.
Izoh (0)