“Budjetga tushmayotgan soyadagi pullar”. O‘zLiDeP press-klubida yashirin iqtisodiyotni bartaraf etish masalasi muhokama qilindi (video)

Toshkent shahrida “O‘zLiDeP press-klubi”ning navbatdagi sessiyasi bo‘lib o‘tdi. Unda yashirin iqtisodiyotni qisqartirish, tovarlarning noqonuniy aylanmasini oldini olish masalalari muhokama qilindi, deya xabar bermoqda “Daryo” muxbiri.

Sessiyada O‘zbekiston liberal demokratik partiyasi deputatlari, soliq, bojxona, farmatsevtika, prokuratura va boshqa tashkilotlar mutaxassislari ishtirok etdi.

O‘zLiDeP bo‘lim mudiri Baxtiyor Ruhiddinovning aytishicha, xufiyona iqtisodiyotni qisqartirishning muhim choralaridan biri barcha tashkilotlarni hamkorlikda ishlashidir.

“Sessiyada yashirin iqtisodiyotning 3 ta yo‘nalishi: farmatsevtika, alkogol va tamaki mahsulotlari kontrabandasini oldini olish masalasida muloqot qilindi. Bu masalaga kompleks yondashish muhim. Shuning uchun ko‘plab vazirlik va idoralar bilan hamkorlikda ishlansa, natijaga erishish oson bo‘ladi. Sessiyani jonli efir orqali ijtimoiy tarmoqlarda keng yoritishimizdan maqsad – jamoatchilikni yashirin iqtisodiyotga qarshi hissini shakllantirishdan iborat”– dedi mutaxassis.

Sessiyada mamlakatda tamaki mahsulotlari kontrabandasi o‘sib borayotganiga alohida urg‘u berildi. Ta’kidlanishicha, so‘ngi 2 yil ichida tamaki mahsulotlarining noqonuniy aylanmasi hajmi 4 foizdan 15 foizga ortgan. O‘zaro muloqotda Davlat bojxona qo‘mitasi xodimi Ulug‘bek Qosimov noqonuniy aylanmasiga chek qo‘yilgan dori, alkogol va tamaki mahsulotlarining miqdori haqida ma’lumot berdi.

“2022-yilning o‘tgan 9 oyi davomida 670 milliard so‘mlik mamlakatga noqonuniy olib kirilayotgan dori, alkogol va tamaki mahsulotlari ushlangan. Shundan dori vositalari 30,6 milliard so‘mni, tamaki 17,5 milliard so‘mni tashkil qilgan”, – dedi ishtirokchi.

Muloqotda Yangi O‘zbekistonning taraqqiyot strategiyasida kelgusi besh yil ichida aholi jon boshiga yalpi ichki mahsulotni 1,6 barobarga oshirish, 2030-yilga borib respublikani “daromadi o‘rtachadan yuqori bo‘lgan davlatlar” qatoriga kirish belgilangan. Mazkur maqsadga yetish uchun esa yashirin iqtisodiyotni keskin qisqartirish, tovarlarning noqonuniy aylanmasini oldini olish, iste’molchilar huquqlarini himoya qilish, shaffof iqtisodiy va raqobat muhitini yaratish lozim. Shu bilan birga, kontrabanda muammosiga qarshi kurashishda faol jamoatchilik nazoratini o‘rnatish ham muhim ahamiyatga ega.