Қорақалпоғистон халқ таълими вазири Ахмед Наримбетов ва мактабгача таълим вазири Гулзира Бахиевага ҳайфсан берилди. Бу ҳақда Вазирлар Кенгашининг фармойиши қабул қилинган.
Фармойишга кўра, иккала вазир Қорақалпоғистонда 2022/2023 йиллар куз-қиш мавсумида амалга оширилиши белгиланган чора-тадбирларнинг ижросини ўз вақтида таъминламаган. Шунингдек, ижтимоий соҳа объектларини мавсумга тайёрлашда ўз хизмат вазифаларига масъулиятсизлик билан ёндашган.
Қўшимча қилинишича, капитал таъмирлаш ишлари белгиланган 4 та умумтаълим мактабларида ишлар охирига етказилмаган. 6 та мактабгача таълим ташкилотларида жорий таъмирлаш ишлари якунланмаган.
Тахтакўпир туманидаги 3-сонли мактабгача таълим ташкилотида куз-қиш мавсуми бошланган бўлишига қарамай, иситиш қозонларини алмаштириш ва ички иситиш тизимларини таъмирлаш ишлари шу кунга қадар якунига етказилмаган.
Маълумот учун, Нукусдаги шахмат мусобақаси ғолибларига футболка ва майка совға қилингани кулгига сабаб бўлгач, Қорақалпоғистон Халқ таълими вазирлиги томонидан электр печ ҳам берилганди.
Бир муддат аввал Қорақалпоғистон транспорт вазирига нисбатан интизомий чора қўлланганди. Ундан олдин эса Қорақалпоғистон раҳбари 2 нафар вазир ва 7 нафар ҳокимни огоҳлантириб, уларга йил якунига қадар имконият берганди.
Изоҳ (0)