Марғилон шаҳрида «Атлас байрами» V халқаро анъанавий тўқимачилик фестивалининг тантанали очилиш маросими бўлиб ўтди. Бу ҳақда «Дарё» мухбири Азизжон Эрматов хабар бермоқда.
Қайд этилишича, фестиваль Туризм ва маданий мерос вазирлиги, Фарғона вилояти ҳокимлиги, ЮНЕСКОнинг Ўзбекистондаги ваколатхонаси, республика «Ҳунарманд» уюшмаси ва бошқа ташкилотлар ташаббуси билан ўтказилмоқда.
Фестивальда дунёнинг 21 та давлатидан 90 га яқин моҳир дизайнерлар, таниқли маданият арбоблари, санъатшунос олимлар, маҳаллий ва хорижий оммавий ахборот воситалари вакиллари иштирок этмоқда.
Фестивальда Марғилон ипакчилигини кенг тарғиб этиш, миллий матолардан фойдаланган ҳолда либослар дизайнини яратиш ва анъанавий ҳунармандчиликни ривожлантириш, атлас ва адрасларга безак бериш, ипак матоларга нақш ва гуллар босиш, ўтган асрларда юртимизда машҳур бўлган газламалар тарихини ўрганиш масалаларига эътибор қаратилади.
Фестиваль олдидан 16—19 октябрь кунлари Қўштепа туманидаги Ҳунармандлар марказида таниқли усталар иштирокида анъанавий ҳунармандчилик ҳамда либослар дизайни бўйича маҳорат дарслари бўлиб ўтди.
Фестиваль доирасида «Замонавий дунёда анъанавий тўқимачиликнинг ўрни» халқаро конференцияси, «Буюк ипак йўли ворислари» анъанавий тўқимачилик маҳсулотлари кўргазмаси, «Ikat маҳсулотларини ишлаб чиқилиши ва экспорти соҳасидаги муваффақиятлар ва тўсиқлар» мавзусида давра суҳбати ўтказилиши кўзда тутилган.
Байрамда тўқимачилик ва амалий санъат буюмлари ярмаркаси, халқ сайли, аския ва катта ашула ижрочилиги, фольклор ансамбллари, халқ ижрочиларининг дастурлари, концертлар, кураш мусобақаси, дорбозлар ва қўғирчоқ театрлари томошалари ҳам намойиш этилади.
Фестиваль 22 октябрга қадар давом этади. Асосий тадбирлар Марғилон шаҳридаги ижодкорлар боғида бўлиб ўтмоқда.
Изоҳ (0)