O‘zbekiston va Qirg‘iziston o‘rtasida yo‘lovchi avtobuslari va temiryo‘l qatnovlari tiklanishi mumkin. Bu haqda Investitsiyalar va tashqi savdo vaziri Jamshid Xo‘jayev va Qirg‘iziston Vazirlar Mahkamasi Raisining o‘rinbosari Baxit Toroboyev o‘rtasida bo‘lib o‘tgan uchrashuvda bildirilgan.
Vazirlik matbuot xizmatining qayd etishicha, videokonferensiya tarzida o‘tgan uchrashuvda tomonlar transport va logistika sohasidagi hamkorlik sohasida yo‘lovchi avtobuslari va temiryo‘l tashishlarini qayta tiklash, ikki davlat o‘rtasidagi aviaqatnovlar sonini ko‘paytirish, shuningdek, Irkeshtam—Daroot—Qo‘rg‘on—Uch-Qo‘rg‘on avtomobil yo‘lini qurish imkoniyatlari muhokama qilindi. Tomonlar ushbu yo‘nalishda barcha zarur choralarni ko‘rishga tayyor ekanliklarini bildirdi.
Uchrashuvda sanoat kooperatsiyasini rivojlantirish sohasida qishloq xo‘jaligi texnikasi va avtomobillar, qurilish materiallari, kalsiy karbid ishlab chiqarishni yo‘lga qo‘yish istiqbollari ham muhokama qilingan. Shu nuqtai nazardan, chegaraoldi hududda Sanoat kooperatsiyasi markazini tashkil etish, to‘qimachilik majmuasi va quvvati 6,7 MVt bo‘lgan Kogart kichik gidroelektr stansiyasini qurish masalalari ham ko‘rib chiqildi. Tomonlar investitsiya kelishuvlari to‘plamini ishlab chiqishni imkon qadar tezroq yakunlash bo‘yicha kelishuvga erishdi.
Qishloq xo‘jaligi sohasida hamkorlikni kengaytirish imkoniyatlarini muhokama qilib, tomonlar birgalikda oziq-ovqat va urug‘lik kartoshka yetishtirishni tashkil etish, chorvachilik komplekslarini yaratish, shuningdek, qishloq xo‘jaligi mahsulotlari, issiqxonalar uchun uskunalar va jun mahsulotlari ishlab chiqarish uchun xomashyo yetkazib berish bo‘yicha hamkorlikni faollashtirishga kelishib oldi.
Bishkekda ikki tomonlama hamkorlik bo‘yicha O‘zbekiston—Qirg‘iziston hukumatlararo qo‘shma komissiyasining 10-yig‘ilishi va biznes-forumni ikki mamlakat mintaqalari rahbarlari ishtirokida yuqori tashkiliy darajada va mazmun jihatidan boyitilgan tarzda o‘tkazish masalalari ham ko‘rib chiqilgan.
Mavzuga doir: O‘zbekiston va Vengriya investorlari hamkorlikda aviakompaniya yaratishi mumkin
Izoh (0)