Toshkentda ayol 7 yildan buyon eri tomonidan muntazam ravishda kaltaklab kelingani haqida xabar berilgan edi. Shahar Ichki ishlar bosh boshqarmasi holat yuzasidan munosabat bildirdi.
Ma’lum qilinishicha, turmush o‘rtog‘iga tan jarohati yetkazgan shaxsga nisbatan jinoyat ishi qo‘zg‘atilgan.
1992-yilda tug‘ilgan Shirin D. Yakkasaroy tumani IIO FMBga ariza bilan murojaat qilib, uning turmush o‘rtog‘i — 1976-yilda tug‘ilgan Dilmurod D. unga tan jarohati yetkazganini ma’lum qilgan. Shuningdek, qonuniy chora ko‘rishni so‘ragan.
Mazkur holat yuzasidan Yakkasaroy tumani IIO FMB huzuridagi tergov bo‘limi tomonidan Jinoyat kodeksining 105-moddasi (qasddan badanga o‘rtacha og‘ir shikast yetkazish) bilan jinoyat ishi qo‘zg‘atilgan. Dilmurod D.ga nisbatan qamoqqa olish ehtiyot chorasi qo‘llangan. Tergov davom etmoqda.
O‘zi nima bo‘lgandi?
Ayolning onasi Facebook’da post qoldirib, qizi eri tomonidan muntazam kaltaklanib kelayotganini bildirgan.
Onaning so‘zlariga ko‘ra, ularning voyaga yetmagan uch nafar farzandi bo‘lib, kaltaklanishlar bolalar ko‘z oldida yuz berib kelgan. Birgina 2,5 oy ichida kuyovi qizini to‘rt marta kaltaklab, qovurg‘alarini sindirgan. So‘nggi vaqtlarda kaltaklashlariga qo‘shib kamar bilan bo‘g‘ishni ham boshlagan.
“Eskpertning so‘zlariga ko‘ra, yana 20 sekund turganida u o‘lib qolishi mumkin edi. Yaxshiyam u qizimni kamar yordamida ikkinchi qavatdan tashlab yubormoqchi bo‘lganida u yirtilib ketgani. Bunisi hammasidan oshib tushdi”, — deb yozadi ayol.
Shunday kunlarning birida burni, tishlari singan va miyasi chayqalgan qizini kechasi bilan yerto‘ladagi basseynda kafel ustida qoldirgan. Bundan kaltaklashlardan so‘ng ovoza bo‘lishidan qo‘rqib, kuyovning o‘zi ayolni shifoxonaga olib borgan va “o‘zim yiqilib tushdim”, deb aytishga majbur qilgan.
Ayolning aytishicha, uning farzandlari bir yarim, uch va besh yoshda bo‘lib, kasalxonada yotib davolanish imkoni bo‘lmagan. Bunga eri yo‘l qo‘ymagan ham.
Qizi bir marta tibbiy ekspertizaga borishga erishgan, ammo qovurg‘alari va tishlarining sinishi va miya chayqalishi yengil tan jarohati deb tasniflangan. Qovurg‘alari singani esa tegishli hujjatlar taqdim etilgan bo‘lsa-da, umuman qayd etilmagan. Bularning barchasiga kuyovi osonlikcha erishgan.
Ona qizining kaltaklanganlari asoratlari aks etgan suratni ham havola qilgan bo‘lib, uning aytishicha, ekspert ushbu suratlarga qarab uning og‘irligi darajasini aniqlash tugul uni tan jarohati deb tasniflay olmasligi haqida qaror chiqargan.
Bundan tashqari, qizi va o‘zida himoya orderi borligiga qaramay, kuyovi uning talablarini buzayotgani haqida bir necha marotaba murojaat qilganiga qaramasdan Yakkasaroy tuman IIB Profilaktika bo‘limi xodimlari tomonidan hech qanday chora-tadbirlar ko‘rilmayotganini bildirgan.
“Tushunmayapman, ichki ishlar organlarimiz nimani kutishyapti? Quyi Chirchiqdagi voqea qaytarilishinimi? O‘shanda ham sho‘rlik ayolni zolim eridan himoya qilishmagan va o‘sha kechasi u pichoqlangandi”, — deb yozadi u.
Qizi bilan sodir bo‘lgan navbatdagi xo‘rlanish va uning ortidan bolasi tushib qolganidan so‘ng ona kuyovga qarshi qonuniy chora ko‘rishga qattiq bel bog‘lagan. Ayni paytda aprel oyida qovurg‘alari singani holati bo‘yicha Yakkasaroy tumani prokuraturasi tomonidan jinoyat ishi qo‘zg‘atilgan, tergov harakatlari olib borilmoqda.
Izoh (0)