Тошкентда аёл 7 йилдан буён эри томонидан мунтазам равишда калтаклаб келингани ҳақида хабар берилган эди. Шаҳар Ички ишлар бош бошқармаси ҳолат юзасидан муносабат билдирди.
Маълум қилинишича, турмуш ўртоғига тан жароҳати етказган шахсга нисбатан жиноят иши қўзғатилган.
1992 йилда туғилган Ширин Д. Яккасарой тумани ИИО ФМБга ариза билан мурожаат қилиб, унинг турмуш ўртоғи — 1976 йилда туғилган Дилмурод Д. унга тан жароҳати етказганини маълум қилган. Шунингдек, қонуний чора кўришни сўраган.
Мазкур ҳолат юзасидан Яккасарой тумани ИИО ФМБ ҳузуридаги тергов бўлими томонидан Жиноят кодексининг 105-моддаси (қасддан баданга ўртача оғир шикаст етказиш) билан жиноят иши қўзғатилган. Дилмурод Д.га нисбатан қамоққа олиш эҳтиёт чораси қўлланган. Тергов давом этмоқда.
Ўзи нима бўлганди?
Аёлнинг онаси Facebook’да пост қолдириб, қизи эри томонидан мунтазам калтакланиб келаётганини билдирган.
Онанинг сўзларига кўра, уларнинг вояга етмаган уч нафар фарзанди бўлиб, калтакланишлар болалар кўз олдида юз бериб келган. Биргина 2,5 ой ичида куёви қизини тўрт марта калтаклаб, қовурғаларини синдирган. Сўнгги вақтларда калтаклашларига қўшиб камар билан бўғишни ҳам бошлаган.
«Эскпертнинг сўзларига кўра, яна 20 секунд турганида у ўлиб қолиши мумкин эди. Яхшиям у қизимни камар ёрдамида иккинчи қаватдан ташлаб юбормоқчи бўлганида у йиртилиб кетгани. Буниси ҳаммасидан ошиб тушди», — деб ёзади аёл.
Шундай кунларнинг бирида бурни, тишлари синган ва мияси чайқалган қизини кечаси билан ертўладаги бассейнда кафел устида қолдирган. Бундан калтаклашлардан сўнг овоза бўлишидан қўрқиб, куёвнинг ўзи аёлни шифохонага олиб борган ва «ўзим йиқилиб тушдим», деб айтишга мажбур қилган.
Аёлнинг айтишича, унинг фарзандлари бир ярим, уч ва беш ёшда бўлиб, касалхонада ётиб даволаниш имкони бўлмаган. Бунга эри йўл қўймаган ҳам.
Қизи бир марта тиббий экспертизага боришга эришган, аммо қовурғалари ва тишларининг синиши ва мия чайқалиши енгил тан жароҳати деб таснифланган. Қовурғалари сингани эса тегишли ҳужжатлар тақдим этилган бўлса-да, умуман қайд этилмаган. Буларнинг барчасига куёви осонликча эришган.
Она қизининг калтакланганлари асоратлари акс этган суратни ҳам ҳавола қилган бўлиб, унинг айтишича, эксперт ушбу суратларга қараб унинг оғирлиги даражасини аниқлаш тугул уни тан жароҳати деб таснифлай олмаслиги ҳақида қарор чиқарган.
Бундан ташқари, қизи ва ўзида ҳимоя ордери борлигига қарамай, куёви унинг талабларини бузаётгани ҳақида бир неча маротаба мурожаат қилганига қарамасдан Яккасарой туман ИИБ Профилактика бўлими ходимлари томонидан ҳеч қандай чора-тадбирлар кўрилмаётганини билдирган.
«Тушунмаяпман, ички ишлар органларимиз нимани кутишяпти? Қуйи Чирчиқдаги воқеа қайтарилишиними? Ўшанда ҳам шўрлик аёлни золим эридан ҳимоя қилишмаган ва ўша кечаси у пичоқланганди», — деб ёзади у.
Қизи билан содир бўлган навбатдаги хўрланиш ва унинг ортидан боласи тушиб қолганидан сўнг она куёвга қарши қонуний чора кўришга қаттиқ бел боғлаган. Айни пайтда апрель ойида қовурғалари сингани ҳолати бўйича Яккасарой тумани прокуратураси томонидан жиноят иши қўзғатилган, тергов ҳаракатлари олиб борилмоқда.
Изоҳ (0)