Davlat xavfsizlik xizmati tomonidan 19-oktabr kuni Toshkent shahrida “Afg‘oniston: mintaqaviy bog‘liqlik, xavfsizlik va rivojlanish” mavzusida xalqaro konferensiya tashkil etildi. Bu haqda O‘zA xabar qildi.
Qayd etilishicha, forum joriy yilning iyul oyida Toshkentda o‘tkazilgan “Afg‘oniston: xavfsizlik va iqtisodiy rivojlanish” mavzusidagi xalqaro konferensiyaning mantiqiy davomi bo‘lib, u tomonlarning Afg‘onistonning rivojlanishi va xavfsizligini mustahkamlash borasidagi fikrlari bir ekanini tasdiqladi.
Toshkent uchrashuvida Afg‘oniston, Pokiston, Eron, Rossiya, Turkiya, Ozarbayjon, Tojikiston, Turkmaniston, Qirg‘iziston, Qozog‘iston hamda O‘zbekiston xavfsizlik organlari va razvedkaviy xizmatlari delegatsiyalari ishtirok etdi.
Tadbir qatnashchilariga Shavkat Mirziyoyevning tabrigini o‘qib eshittirildi.
Xalqaro anjuman yakunida ishtirokchi davlatlar vakillari tomonidan o‘zaro manfaatli hamkorlik bo‘yicha yo‘nalishlar va aniq vazifalar belgilab olindi, shuningdek, global hamda mintaqaviy xavfsizlikka jiddiy tahdid solayotgan terrorizmga qarshi birgalikda qat’iy kurashishga kelishib olindi.
Izoh (0)