Kuchli shamol sabab Surxondaryo viloyatining Boysun tumanidagi 23 ta mahalla elektr tokisiz qoldi, hokimlik binosining tomi qulab tushdi. Bu haqda viloyat hokimligi axborot xizmati xabar berdi.
Bugun Boysun tumanida boshlangan kuchli shamol 23 ta mahalladagi elektr simlarida qisqa tutashuvlarni yuzaga keltirib, iste’molchilarni elektr energiyasidan uzib qo‘ygan. Aloqa simlarida ham uzilishlar sodir bo‘lgan. Ikkita transformatorda nosozlik ro‘y bergan.Shuningdek, kechga yaqin tuman hokimligi binosining tom qismini qulatgan. Mutaxassislar hodisa sodir bo‘lishi oldidan shamol tezligi yanada kuchayganini aytmoqda, — deyiladi viloyat hokimligi axborotida.
Qo‘shimcha qilinishicha, tabiiy ofatdan tevarak-atrofdagi transport vositalari va yo‘lovchilar jabrlanmagan.
Ayni paytda hududlarda o‘rganish ishlari olib borilmoqda. Yuzaga kelgan nosozliklarni tezkorlik bilan bartaraf etish maqsadida tuman hokimligi hamda tegishli tashkilotlar vakillaridan iborat ishchi guruh tuzilib, zarur choralar ko‘rilmoqda, — deyiladi hokimlik xabarida.
Izoh (0)