Rossiyaning Moskva shahrida ish vaqtida jarohat olgan O‘zbekiston fuqarosiga kompensatsiya to‘landi. Bu haqda Tashqi mehnat migratsiyasi agentligi xabar qildi.
Qayd etilishicha, aprel oyida ishlash maqsadida Moskva shahriga borgan farg‘onalik M.N. avgust oyida baxtsiz hodisa oqibatida og‘ir tan jarohat olib, mehnatga layoqatsiz bo‘lib qolgan.
M.N.ning yaqin qarindoshlari Migratsiya agentligiga amaliy yordam so‘rab murojaat qilgan. Holat o‘rganilib, fuqaro Xorijda mehnat faoliyatini amalga oshiruvchi fuqarolarni qo‘llab-quvvatlash hamda ularning huquq va manfaatlarini himoya qilish jamg‘armasi hisobidan, shifokor nazoratida O‘zbekistonga olib kelingan.
Shuningdek, Tashqi mehnat migratsiyasi agentligining Moskva shahridagi vakolatxonasi negizidagi Mehnat migrantlarining murojaatlari bilan ishlash va ularga huquqiy ko‘maklashish markazi tomonidan fuqaroga ish beruvchidan 1 million 350 ming rubl miqdorida moddiy yordam undirib berilgan.
Izoh (0)