Disney studiyasi Pixar’ning mashhur “Chaqmoq Makvin” animatsion filmi asosida serial suratga olishga ruxsat berdi. Deadline’ning xabar berishicha, qahramonlarga ovoz bergan barcha aktyorlar yangi loyihada ham to‘liq tarkibda ishtirok etadi.
Serialda Makvin va Metrning Radiator Springs shahridagi yangi sarguzashtlari tasvirlanadi. Bosh qahramonlarga Ouen Uilson, Bob Piterson va Jon Ratzenberger ovoz beradi. Ularga Lea Lyuis va Yuriy Lovental hamda yangi qahramon — Miss Blinkerga ovoz beradigan Sheril Li Ralf qo‘shiladi.
“Chaqmoq Makvin” franshizasi uchta asosiy film, ikkita samolyotlar haqidagi spin-off va bir nechta seriallardan iborat.
Franshizaning asosiy tarkibiy qismlari:
“Chaqmoq Makvin” (2006) — original film, AQSHda ochilish haftaligida 60,1 million dollar daromad keltirgan va umumiy daromadi 462 million dollarga yetgan;
“Chaqmoq Makvin 2” (2011) — poygachilarning xalqaro sarguzashtlari haqida, butun dunyo bo‘ylab 560 million dollardan ortiq atrofida daromad olgan;
“Chaqmoq Makvin 3” (2017) — byudjeti taxminan 175 million dollar, global daromadi 383,9 million dollarni tashkil etgan.
Bundan tashqari, Disney “Qasoskorlar: Eng qudratli do‘stlar” (Marvel’s Avengers: Mightiest Friends) multserialini ishlab chiqarishni yo‘lga qo‘ydi, bu Marvel’ning maktabgacha ta’lim auditoriyasiga mo‘ljallangan birinchi seriyasi bo‘ladi.
Ikkala serial premyerasi 2027-yilda bo‘lib o‘tishi rejalashtirilgan.
Izoh (0)