O‘zbekistonda Ichki ishlar xodimlarining kimnidir so‘kkanini, urganini, hatto tepgani-yu, o‘ldirib qo‘yganini eshitganmiz. Yaxshi bilamiz. Ammo IIB xodimlarining homilador ayolga qo‘l ko‘targani yoki uning ketiga tepgani bilan bog‘liq holatga duch kelmaganmiz. Qarshi shahrida yashovchi ayol u bilan shunday holat ro‘y berganini iddao qilmoqda. “Daryo”ning navbatdagi maqolasi ana shu haqda.
Qashqadaryolik Marhabo Boymurodova tahririyatga murojaat qilib, Qarshi shahrida IIB xodimlari va mulozimi uning homilador holiga qaramay qo‘l ko‘targani, tepgani va bo‘g‘ib, zo‘ravonlik qilganini aytmoqda.
2025-yilning 13-iyun kuni bir ayol bilan o‘zaro muhokamamiz bor edi. O‘sha bo‘yicha meni nohaq, hech qanaqa faktlarsiz, yasama, soxta faktlar bilan ichki ishlar bo‘limiga olib borishdi. Va u yerda o‘sha Farrux Ibragimov — ichki ishlar bo‘limi boshlig‘i, meni sudrab urdi. Har xil gaplar bilan haqorat qildi. Shunchalik baqirib haqorat qildiki, uning ovozi ko‘chaning narigi yog‘iga eshitildi, ichki ishlar bo‘limini tutib ketdi. Men bu bo‘yicha 1102 telefon raqamiga qo‘ng‘iroq qilib, murojaat qoldirdim. Xizmat tekshiruvi o‘tkazishlarini so‘radim, talab qildim, lekin natija yo‘q, deydi u.
Ayolning bildirishicha, voqea 2025-yilning 13-iyun kuni Qarshi shahar IIBga tegishli binolarda sodir bo‘lgan.
O‘sha kuni uyimga ikki nafar jinoyat qidiruv xodimlari borishgan. Birovining ismi Jasur, ikkinchisi esa Siroj bo‘lgan. Buni keyinroq onamdan so‘rab bilganman. Ular uyga kelib, onamni haqorat qilishgan. Hammasi kamera va videoyozuvga tushgan. O‘sha videoyozuvlarni olib, bu bo‘yicha murojaat qildim. “Intizomiy chora ko‘rildi”, deyishdi. Meni onamdan haqorat qilib, onadan so‘kkan odam qanday qilib oddiy intizomiy chora bilan qutulib ketishi mumkin? Oddiy fuqaro birontasini so‘ksa, 15-20 million jarima to‘laydi, lekin ichki ishlar xodimiga hamma narsa mumkinmi?, deydi Boymurodova.
Murojaatchi Qarshi shahar Ichki ishlar boshqarmasi boshlig‘i Farrux Ibragimov uni boshqa bir fuqarodan uzr so‘rashga majbur qilganini, buni rad etgani uchun kaltaklaganini aytmoqda.
Meni Ichki ishlar bo‘limiga olib borishgan kuni boshqarma boshlig‘i menga bosim o‘tkazdi. “Sen bilan tortishgan ayoldan tiz ko‘chib kechirim so‘raysan ”, dedi. Rad etganim uchun, meni sudrab, orqamga tepib, xonasiga kirmoqchi bo‘lganimda, hamma joyimni ko‘kartirib urdi. Men o‘sha yerda hushimdan ketib qolganman. Tez yordam darhol chaqirilmagan, oradan to‘rt-besh soat o‘tgandan keyingina chaqirishga majbur bo‘lishgan. Men o‘shanda ikki oylik homilam va qo‘limda yetti oylik farzandim bor edi. Shunga qaramasdan meni bir kun o‘sha yerda vaqtincha saqlash xonasida sababsiz, asossiz saqlab o‘tirishdi. Farrux Ibragimov 48 soatgacha ushlab o‘tirishga haqqim bor, men boshliqman, dedi. Ertasi kuni sudga olib chiqishdi va bo‘ynimga uchta-to‘rtta modda bilan jarima qo‘yib berishdi. O‘n kun ichida apellyatsiyaga topshirdim va sud apellyatsiyasi mening apellyatsiyamni qanoatlantirdi. Mening shikoyatlarimni faktli va asosli deb topdi, deydi u.
Maʼlum bo‘lishicha, Marhabo Boymurodova Jinoyat ishlari bo‘yicha Qarshi shahar sudining 2025-yil 14-iyundagi qaroriga ko‘ra, Maʼmuriy javobgarlik to‘g‘risidagi kodeksning 183-moddasi (mayda bezorilik), 194-moddasi (ichki ishlar organlari xodimining qonuniy talablarini bajarmaslik) va 2022-moddasi (yolg‘on axborot tarqatish) bilan aybli deb topilib, 9 mln 375 ming so‘m jarimaga tortilgan. Ushbu sud qarori Qashqadaryo viloyat sudi jinoyat ishlari bo‘yicha sudlov hayʼati apellyatsiya instansiyasining 2025-yil 10-iyul kundagi qarori bilan bekor qilingan.
Murojaatchi dastlabki sud instansiyasidagi mayda bezorlik, IIB xodimining qonuniy topshirig‘iga bo‘ysunmaslik va yolg‘on axborot tarqatgani haqidagi iqrorlarini IIB xodimlari bosimi bilan tan olganini qo‘shimcha qilmoqda.
IIBning Azamat ismli xodimi shunaqa topshiriq berdi. Hammasini bo‘yningga olsang chiqasan, bo‘lmasa yana olib qolamiz dedi, deydi ayol.
Marhabo Boymurodova sud qilingach, haq-huquqni tiklash uchun advokat yollagan. Sud ekspertizaga murojaat qilgan. Respublika sud tibbiy ekspertiza ilmiy-amaliy markazi Qashqadaryo filiali eksperti Zafar Bo‘tayevning 2025-yil 24-iyundagi xulosasida murojaatchining tanasida qontalashlar borligi maʼlum qilingan.
Ko‘rikdan o‘tuvchining tanasi tekshirib ko‘rilganida ikkala yelka o‘rta uchligi, ichki yuzasi, chap yelka bilak bo‘g‘imi tashqi, chap dumba yuqori, ikkala son sohalari qontalashlari ko‘rinishidagi tan jarohatlari aniqlandi. Mavjud tan jarohatlari biror bir o‘tmas, qattiq jism natijasida yuzaga kelgan, deyiladi ekspert xulosasida.
-LkG6UfRP.avif)
Mutaxassis fikriga ko‘ra, ushbu tan jarohatlari ekspertiza qilinishidan oldin 2-6 kun oralig‘ida orttirilgan.
“Daryo” murojaatchining iddaolariga aniqlik kiritish uchun Qashqadaryo viloyat IIB axborot xizmati rahbari Iroda Rasulova bilan suhbatlashdi.
Murojaatchi yolg‘on maʼlumot bergan. Hozir Farrux Ibragimov bilan gaplashdim. U o‘sha ayol bilan yuzma-yuz kelmaganini aytdi. Qolgan ikki nafar xodimga chora qo‘llanilgani haqidagi maʼlumot ham yolg‘on, deydi boshqarmaning OAV bilan ishlovchi masʼuli.
Iroda Rasulova jurnalistning “Farrux Ibragimov 2025-yilning 13-iyun kuni boshqarmaga olib borilgan Marhabo Boymurodova bilan ko‘rishmaganmi?”, deya bergan savoliga “buning anig‘ini bilmayman” deb javob qaytardi. Farrux Ibragimov bilan muloqot qilish haqidagi so‘rovimiz esa rad etildi.
“Daryo” jurnalisti ushbu maqolani tayyorlash davomida sud qarori bilan ushbu ish Qarshi shahar prokuraturasiga qaytarilganini bilgach, uning taqdiri bilan ham qiziqdi. Va prokuror xulosasi qanday bo‘lganini bilish uchun Bosh prokuratura axborot xizmatiga aloqaga chiqdi. Biroq Hayot Shamsutdinov hozircha bunga aniqlik kiritmadi.
“Daryo” voqealar rivojini kuzatishda davom etadi.
Izoh (0)